मेक्सिको । मेक्सिकोको मध्य क्षेत्रमा पर्ने मेक्सिको राज्यको टेमास्काल्सिङ्गो नगरपालिकामा धार्मिक पर्वका क्रममा भण्डारण गरेर राखिएको पटाका पड्किँदा कम्तीमा १० जनाको मृत्यु भएको छ भने ६४ जना घाइते भएका छन् ।
राज्य सरकारले दिएको जानकारीअनुसार शनिबार राति करिब साढे ९ बजे स्थानीय समयअनुसार एउटा चर्चमा उक्त विस्फोट भएको हो । विस्फोटका कारण चर्चको छानोको केही भाग र नजिकैको पर्खाल भत्किँदा केही मानिस भग्नावशेषमा पुरिएका थिए ।
घटनास्थलमै आठ जनाको मृत्यु भएको थियो । घाइतेहरूलाई उपचारका लागि आसपासका अस्पतालमा लगिएको छ ।
घटनापछि उद्धार तथा सुरक्षाका लागि नागरिक सुरक्षा टोली, सशस्त्र सेना र राज्य प्रहरी परिचालन गरिएको थियो ।
घटनास्थलमा बाँकी रहेको विस्फोटक सामग्रीको जाँच गरी थप जोखिम हुन नदिन विशेषज्ञमार्फत त्यसलाई सुरक्षित रूपमा निष्क्रिय पार्न आवश्यक सुझाव दिइएको अधिकारीहरूले बताएका छन् ।
घटनाको कारणबारे सम्बन्धित निकायले थप अनुसन्धान गरिरहेको छ ।