मस्को, १४ भदौ । रुसले युक्रेनले रुसी ऊर्जा तथा नागरिक पूर्वाधारमा गरेको आक्रमणको जवाफमा युक्रेनको ऊर्जा पूर्वाधारमा ठूलो आक्रमणको तयारी थालेको जनाएको छ ।
रुसी रक्षा मन्त्रालयले आइतबार टेलिग्राममार्फत युक्रेनको ऊर्जा क्षेत्रका संरचनामाथि ठूलो मात्रामा आक्रमणको तयारी सुरु गरिएको जनाएको हो ।
गत हिउँदमा रुसले युक्रेनका विद्युत् उत्पादन तथा प्रसारण संरचनामा पटकपटक आक्रमण गर्दा देशको ऊर्जा प्रणालीमा ठूलो क्षति पुगेको थियो । त्यसका कारण लाखौँ मानिसले अत्यधिक चिसोका बीच विद्युत् तथा ताप आपूर्तिको समस्या झेल्नुपरेको थियो ।
पछिल्ला महिनामा दुवै पक्षले लामो दूरीका ड्रोन तथा क्षेप्यास्त्रमार्फत एकअर्काका सैन्य तथा ऊर्जा पूर्वाधार, गोदाम, तेल प्रशोधन केन्द्र र बन्दरगाहलगायत संरचनालाई लक्षित गर्दै आएका छन् । ती आक्रमणमा सर्वसाधारणसमेत हताहत भएका छन् ।
रुसी रक्षा मन्त्रालयले आइतबार किएभस्थित एस्बेस्टोस तथा सिमेन्ट उत्पादन गर्ने एक कारखानामा आक्रमण गरेको दाबी गरेको छ । उक्त कारखानाका गोदाममा विस्फोटक पदार्थ भण्डारण गरिएको र त्यहाँ ड्रोन तथा हतियार उत्पादन हुने मन्त्रालयको दाबी छ ।
यसअघि शनिबार किएभको उपनगरमा रहेको गोलाबारुद भण्डारमा रुसी आक्रमण हुँदा ठूलो विस्फोट भएको थियो । स्थानीय अधिकारीहरूका अनुसार घटनामा कम्तीमा ३७ जनाको मृत्यु भएको थियो ।
यता, युक्रेनी अधिकारीहरूले उत्तरपश्चिमी रुसमा रहेको एक तेल प्रशोधन केन्द्रमा युक्रेनी ड्रोनले आक्रमण गरेको बताएका छन् । आक्रमणपछि त्यहाँ आगलागी भएको उनीहरूले जनाएका छन् । (रासस/एएफपी)
