धनकुटा, भदौ ११ । धनकुटाको चौबिसे गाउँपालिका–७, ठूलोढुंगामा छोराले काठको दाउरा (चिरपट) प्रहार गर्दा ७० वर्षीय बाबुको मृत्यु भएको छ। घटनामा संलग्न रहेको आरोपमा मृतकका ३२ वर्षीय छोरा युवराज लिम्बुलाई प्रहरीले पक्राउ गरेको छ।
प्रहरीका अनुसार २०८३ भदौ ११ गते बिहान करिब ५ः४५ बजे युवराजले आफ्नै बुबा अन्दाजी ७० वर्षीय अमरध्वज लिम्बुको टाउकोमा काठको दाउरा (चिरपट) प्रहार गरेका थिए। गम्भीर चोट लागेका अमरध्वजको घटनास्थलमै मृत्यु भएको थियो।
घटनाबारे बिहान करिब ६ः१५ बजे अस्थायी प्रहरी बिट मौनाबुधुकमा जानकारी प्राप्त भएपछि प्रहरी सहायक निरीक्षक जयप्रकाश रायको कमाण्डमा प्रहरी टोली घटनास्थल पुगेको थियो। त्यसैगरी, इलाका प्रहरी कार्यालय राजारानीबाट प्रहरी निरीक्षक विजय थापाको कमाण्डमा समेत प्रहरी टोली परिचालन गरिएको थियो।
घटनाको थप अनुसन्धान, खोजतलास तथा कानुनी प्रक्रिया अघि बढाउन जिल्ला प्रहरी कार्यालय धनकुटाबाट प्रहरी उपरीक्षक नारायण रञ्जितकारको कमाण्डमा थप प्रहरी टोली घटनास्थलमा खटिएको प्रहरीले जनाएको छ।
घटनापछि फरार भएका युवराजको खोजी गर्ने क्रममा बिहान करिब ८ः१५ बजे घरबाट करिब ५०० मिटर दक्षिणतर्फको जंगलमा लुकिछिपी बसेको अवस्थामा प्रहरीले उनलाई फेला पारी नियन्त्रणमा लिएको हो।
पक्राउ परेका युवराजमाथि घटनाको कारण तथा अन्य पक्षबारे थप अनुसन्धान भइरहेको जिल्ला प्रहरी कार्यालय धनकुटाले जनाएको छ।