काठमाडौँ । नेकपा (मसाल) ले रसुवाको भोटेकोशी नदीमा आएको बाढीबाट हुन गएको जनधनको क्षतिप्रति दु:ख व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८३ भदौ १० गते बुधवार प्रेसवक्तव्य जारी गर्दै पार्टीले दु:ख व्यक्त गरेको हो ।
वक्तव्यमा मृतकप्रति श्रद्धाञ्जली व्यक्त गर्दै उद्धारका लागि उच्च प्रकारका कदम उठाउन जोड दिइएको छ ।
विश्वव्यापी पर्यावरणमा देखा परेको समस्या कारण मानवजाति मात्रै नभएर प्राणी जगत्को अस्तित्व नै खतरामा पुगेको बताउँदै मसालले पर्यावरणको रक्षाप्रति सम्पूर्ण जनता र सरकारको ध्यानाकर्षण गराएको छ ।
प्रेसवक्तव्यको पूर्ण पाठ :
“रसुवा जिल्लामा आएको बाढीबाट ठुलो जनधनको क्षति भएको छ । उक्त बाढीबाट भएको धनजनको क्षतिका लागि हामीले गहिरो दु:ख प्रकट गर्दछौँ र बाढीमा जीवन गुमाएका सम्पूर्णप्रति श्रद्धाञ्जली प्रकट गर्दछौँ । बाढीबाट धनजनको उद्धारका लागि सरकारले उच्च प्रकारको कदम उठाउनुपर्नेमा हामीले जोड दिन्छौँ ।
अहिले विश्वव्यापी रूपमा नै पर्यावरणमा ठुलो समस्या आइरहेको छ । पर्यावरणमा देखा परेको त्यस प्रकारको समस्याले मानवजाति मात्र होइन, सम्पूर्ण प्राणी जगत्लाई नै विनाश गर्ने जोखिमको सम्भावना बढ्दै गएको छ । पर्यावरणलाई विनाश गर्ने जुन क्रियाकलाप भइरहेका छन्, तिनीहरूमाथि कडा नियन्त्रण र निगरानी नहुनाले प्राकृतिक प्रकोपको जोखिम बढेर गएका छन् ।
अहिले नेपालमा तिब्बतबाट रसुवा हुँदै आएको बाढीले जुन क्षति पुर्यायो, त्यो पर्यावरणीय ध्वंसको परिणाम भएको स्पष्ट छ । हामीले सम्पूर्ण प्राणी जगत्का साथसाथै मानवजातिको रक्षाका लागि पर्यावरण संरक्षणमा सम्पूर्ण जनता र सरकारको ध्यान जानुपर्ने आवश्यकतामा जोड दिन चाहन्छौँ ।”
