राजविराज, भदौ ७ गते । सप्तरीको शम्भुनाथ नगरपालिका–३ स्थित ट्राफिक बजारमा दुई वर्षीया बालिका मृत अवस्थामा फेला परेकी छन् ।
स्थानीय मो. इरफानकी छोरी खुसी खातुन आइतबार बिहान घरबाट हराएको सूचना पाएपछि आफन्त तथा स्थानीयवासीको सहयोगमा प्रहरीले खोजी गरेको थियो । खोजीका क्रममा बालिका घरपछाडि मृत अवस्थामा फेला परेकी हुन् ।
जिल्ला प्रहरी कार्यालय सप्तरीका सूचना अधिकारी प्रहरी नायब उपरीक्षक हेमराज घिमिरेका अनुसार घटनास्थलको कानुनी प्रक्रिया पूरा गरी बालिकाको शव परीक्षणका लागि पठाउने तयारी भइरहेको छ ।
बालिकाको मृत्युको घटनामा सौतेनी आमाको संलग्नता हुनसक्ने आशंका स्थानीयवासीले व्यक्त गरेका छन् । यद्यपि, उक्त आशंकाको प्रहरीले पुष्टि गरेको छैन । घटनाको वास्तविक कारणबारे प्रहरीले अनुसन्धान अघि बढाएको जनाएको छ ।
प्रनाउ घिमिरेका अनुसार शव परीक्षणको प्रतिवेदन तथा अनुसन्धानबाट मात्रै बालिकाको मृत्युको कारण र घटनाको विस्तृत विवरण खुल्नेछ । मृतक बालिकाका बुवा वैदेशिक रोजगारीमा रहेको प्रहरीले जनाएको छ ।
