काठमाडौँ । रास्वपा सांसद ज्वाला सङ्ग्रौलाको अभिव्यक्तिलाई लिएर मंगलबार प्रतिनिधि सभा बैठकमा सत्तापक्ष र प्रतिपक्षबीच चर्काचर्की भएको छ।

सङ्ग्रौलाले विगतमा ३५ वर्ष शासन गरेकाहरूका कारण जेनजी आन्दोलन भएको र आन्दोलनमा ज्यान गुमाएकाहरूको रगत नसुक्दै विपक्षीले पुनः शासनको दाबी गरेको टिप्पणी गरेकी थिइन्।

उनको अभिव्यक्तिको प्रतिवाद गर्दै एमाले सांसद साजिदा सिद्दीकीले वर्तमान सरकारले नै गुण्डाराज चलाएको आरोप लगाइन्। उनले जेनजी आन्दोलनमा सरकारले चलाएको गोलीबारे पनि जवाफ दिनुपर्ने माग गरिन्।

दुवै सांसदबीच आरोप–प्रत्यारोप भएपछि विपक्षी सांसदहरूले विरोध जनाएका थिए भने बैठकमा केहीबेर चर्को होहल्ला भएको थियो।