किसनबहादुर अधिकारी, राष्ट्रिय जनमोर्चा बाइसौँ पार्टीस्कुलका प्रशिक्षार्थी

0 राष्ट्रिय जनमोर्चाको बाइसौँ केन्द्रीय पार्टी स्कुलमा सहभागी हुन आउनुभएका किसनबहादुर अधिकारीलाई युगदर्शन मिडियामा स्वागत गर्न चाहन्छौँ । आरामै हुनुहुन्छ ?

– ठिकै छ, सन्चै छु ।

0 प्रशिक्षणमा भाग लिन आउनुभएको भन्ने जानकारी पायौँ । कस्तो खालको प्रशिक्षण हो यो ?

– यो सैद्धान्तिक प्रशिक्षण हो । नेपाल कम्युनिस्ट पार्टी (मसाल) ले आफ्ना कार्यकर्ता जहाँजहाँ छन्, उनीहरूलाई बेलाबेलामा सैद्धान्तिक क्लास दिएर उनीहरूमा लागेको खिया उतार्ने र फिल्डमा स्वच्छ बनाएर पठाउने काम गर्छ । त्यसैअन्तर्गत हामी पनि यहाँ आएका हौँ ।

0 कुनकुन विषयमा प्रशिक्षण लिनुभयो ?

– सैद्धान्तिक क्लासमा द्वन्द्वात्मक भौतिकवादलगायत थुप्रै विषय छन् । यसरी गन्ने हो भने अहिलेसम्म २७ ओटा विषयमा हाम्रो क्लास भयो ।

0 तपाईंहरूलाई कुनकुन प्रशिक्षकले प्रशिक्षण दिनुभयो ?

– हामीलाई मोहनविक्रम सिंह, दुर्गा पौडेल, मनोज भट्ट र रामप्रकाश पुरीलगायत थुप्रै ट्युटर साथीहरूले प्रशिक्षण दिनुभयो ।

0 प्रशिक्षकमा तपाईंहरूको पार्टीभन्दा बाहिरबाट पनि कोही आउनुभएको छ कि छैन ?

– बाहिरबाट पनि आउनुभएको थियो । कसरी स्वस्थ रहने र आफ्नो जीवनमा स्वस्थ रहनका लागि केके गर्नुपर्छ भन्ने कुरा सिकाउन डाक्टर साहब पनि आउनुभएको थियो । त्यसबाट पनि आफू कसरी स्वस्थ रहने भन्नेबारे केही कुरा बुझ्यौँ ।

0 यो प्रशिक्षणमा व्यावहारिक प्रशिक्षण पनि राखिएको छ भन्ने कुरा थियो । व्यावहारिक प्रशिक्षण भन्नाले कस्तो खालको प्रशिक्षण हो ? त्यसमा के के भयो ?

– व्यावहारिक प्रशिक्षण भनेको, यहाँ क्लास लिएर गएपछि आफ्नै फिल्डमा ती विषय लागु गर्ने हो । त्यहाँ गएर कस्तो किसिमको समस्या र परिपाटी छ, त्यसैअनुसार माक्र्सवादी पद्धतिबाट कसरी अगाडि बढाउने भन्ने सोच र विचार बनाएर लैजाने कुरा हुन्छ ।

0 व्यावहारिक प्रशिक्षणमा प्रशिक्षकले आफ्ना धारणा राख्ने हो कि परम्परागत ढङ्गले प्रशिक्षकले मात्र कुरा राख्ने हुन्छ ?

– दुवै कुरा हो । उहाँहरूले परम्परागत प्रशिक्षण पनि दिने गर्नुहुन्छ र समाज विकसित हुँदै जाँदा क्रमश: परिवर्तन हुने भएकाले नयाँ किसिमले जानुपर्ने आवश्यकताबारे पनि सिकाउनुहुन्छ ।

0 अहिलेसम्म जे जति विषयमा प्रशिक्षण लिनुभयो, त्यसमध्ये तपाईंलाई सबैभन्दा बढी छर्लङ्ग भएको विषय कुन लाग्यो ?

– यस्ता विषय थुप्रै छन् । पहिले पनि क्लास लिइयो तर कुनैमा पनि पूर्णता हासिल गरेका थिएनौँ । माक्र्सवादी सिद्धान्तअनुरूप यसरी जानुपर्छ भन्ने जानेका त थियौँ तर पूर्ण रूपमा व्याख्या गर्ने क्षमतामा अलिकति कमी थियो । यहाँ आएपछि द्वन्द्वात्मक भौतिकवादका कुरामा स्पष्ट भयौँ । आदिम साम्यवादी युगदेखि आजसम्म मानव समाज कसरी प्रगति गर्दै आयो र आजको पुँजीवादी युगमा कसरी आइपुग्यौँ भन्ने कुरा थप प्रस्टसँग बुझ्यौँ ।

0 तपाईंहरू उमेरको हिसाबले पनि आधा उमेरभन्दा बढी भइसक्यो र सङ्गठनको हिसाबले भारतदेखि लिएर यहाँसम्म लामो अवधि काम गर्नुभयो । यति लामो अनुभवको आधारमा अहिलेको प्रशिक्षणलाई मूल्याङ्कन गर्दा महत्त्वपूर्ण कुरा के लाग्यो ? तपाईंको पुरानो अनुभव र अहिलेको प्रशिक्षणलाई तुलना गर्दा के फरक पाउनुभयो ?

– सबभन्दा महत्त्वपूर्ण कुरा भौतिकवादी दृष्टिकोण अपनाउनु हो । हामीले समाजमा कुनै पनि काम गर्दा वा आफ्नै दिनचर्यामा पनि भौतिकवादी दृष्टिकोण अपनाएर गयौँ भने सफल भइने रहेछ भन्ने कुरा महत्त्वपूर्ण लाग्यो । हुन त हामी यसलाई सङ्क्षिप्त रूपमा बुझेर सुरुदेखि नै लागेका थियौँ तर यसरी जाँदा भौतिकवादी रूपमा समाजलाई सही ढङ्गले बुझ्न सकिने रहेछ । किसान र आम नेपाली जनताको समस्या सुल्झाउन तथा आजको पुँजीवादी राज्यसत्तालाई विस्थापित गर्न यसै सिद्धान्तअनुरूप नगएसम्म सम्भव हुँदैन भन्ने कुरा मैले बुझेँ ।

0 तपाईंहरूको पार्टी राष्ट्रिय जनमोर्चा निष्कलङ्क मानिन्छ । आमजनताले पार्टीको विषयमा त्यस्तो नकारात्मक टिप्पणी वा खोट लगाएको देखिन्न । लामो समय यही पार्टीमा हिँड्दा र अहिले प्रशिक्षण लिइराख्दा, नीतिसिद्धान्त सही हुँदैमा पनि सङ्गठनको अपेक्षित विकास नहुनुको पछाडि के कस्ता कमजोरी भेट्याउनुभयो ?

– कमजोरीको कुरा गर्दा म भर्खरै सम्पन्न चुनावको प्रसङ्ग जोड्न चाहन्छु । विगतको चुनावभन्दा अहिलेको परिस्थिति अर्कै थियो । चुनावका क्रममा हामी जनताका बिचमा व्यापक रूपमा घरदैलो अभियानमा गयौँ । अरू पार्टीहरू शक्ति प्रदर्शन गरेर गए तर हामी व्यापक घरदैलोमा गयौँ ।

जनताको मनसाय बुझ्दा उहाँहरूको भनाइ थियो– ‘राष्ट्रिय जनमोर्चा सबभन्दा राम्रो पार्टी हो, सानो छ तर निष्कलङ्क छ, यसले कुनै बेइमानी गर्दैन तर यो एउटा सानो पार्टी हो ।’ हामीले उहाँहरूलाई ‘सानो पार्टी भए तपाईंहरू आउनुस् न त, राम्रो काममा त जोडिनुपर्छ’ भन्यौँ । जनतामा जाँदा कसैले पनि तपाईंहरूको पार्टी खराब छ, भ्रष्टाचार गर्छ, नेताहरू यस्ता छन् भन्दैनन् । पार्टी राम्रो छ तर सानो छ भन्छन् ।

केन्द्रले हामीलाई सही दिशा दिइरहेको छ, त्यसमा कुनै शङ्का छैन तर जिल्लाजिल्लामा नेतृत्व गर्ने हामीले जनतालाई नीति राम्रो छ भनेर सही ढङ्गले बुझाउन र उनीहरूका बिचमा प्रभावकारी रूपमा भिज्न सकेनौँ । मुख्य कमी यही नै हो भन्ने मैले बुझेको छु ।

0 अर्थात् तपाईंहरू जनताको बिचमा जानुभयो तर जनतालाई सही ढङ्गले बुझाउन सक्नुभएन ?

– हामीले त बुझाएका छौँ तर उनीहरूले बुझ्न सकिरहेका छैनन् । हामी सही नीति लिएर गएका हौँ । हामीले बुझाउन नसकेको भन्दा पनि उनीहरूले बुझ्न नसकेका हुन्, जसका पछाडि विभिन्न कारण हुन सक्छन् ।

0 विगत ३५ वर्ष शासन गरेका पुराना र ३५ वर्षपछि आएका नयाँ पार्टीको कुरा छ । तपाईंहरूको पार्टीलाई पुरानो पार्टी भन्न मिल्छ कि मिल्दैन ?

– हामी पुरानो पार्टी हौँ ।

0 अनि अहिले ‘पुरानाले देश बिगारे’ भन्छन् नि, यो कुरा सही हो ?

– देश बिगारेको भन्ने कुरा समाजमा जनताले गर्ने चर्चा मात्र हो । ‘नयाँ आउँछन्, नयाँ चाहियो, नयाँ युवकले केही गर्छन्’ भन्ने कुरा गर्छन् तर त्यो त हामीले देखिहाल्यौँ नि, चैत २४ गतेको आन्दोलनपछि बनेको यो सत्ता यति थोरै समयमा कस्तो रहेछ भन्ने स्पष्ट भइसक्यो । पुराना अरू सबै पार्टी ठिक छन् भन्ने पक्षमा हामी छैनौँ तर जहाँसम्म हाम्रो पार्टीको कुरा छ, यो ठिक छ । अन्तत: हाम्रो पार्टीले अगाडि सारेको नयाँ जनवादी क्रान्ति सम्पन्न नभएसम्म देशका समस्याको स्थायी समाधान हुनेवाला छैन ।

0 यो प्रशिक्षणको क्रममा नयाँ र पुरानो राजनीतिक बहसका विषयमा छलफल भयो कि भएन ?

– यस विषयमा छलफल भएको छ ।

0 प्रशिक्षणका आधारमा जिल्लामा गएर नयाँ ढङ्गले काम गर्छु भन्ने आत्मविश्वास बढेको छ ?

– छ नि, आत्मविश्वास थुप्रै बढेको छ । हामी पार्टीका क्याडर हौँ, स्वत:स्फूर्त रूपमा काम गर्नु हाम्रो दायित्व हो तर समयक्रममा कार्यकर्तामा अलिकति लागेको खिया उतार्ने काम यहाँ भएको छ । फर्केर निश्चित रूपमा सही किसिमले जनताको बिचमा जान्छौँ ।

0 फर्केर गइसकेपछि नवलपरासी पश्चिममा राष्ट्रिय जनमोर्चाको सङ्गठन र सङ्घर्षलाई सुदृढ ढङ्गले अगाडि बढाउन के कस्ता योजना बनाउनुभएको छ ?

– योजना छन् । विगतमा जनताका बिचमा जाने सन्दर्भमा हाम्रातर्फबाट जुन कमीकमजोरी रहेका थिए, ती कुरामा अहिले हामी स्पष्ट भएका छौँ । जनतालाई कसरी सचेत बनाउन सकिन्छ भन्ने कुरा बुझेका छौँ, त्यसैअनुसार फिल्डमा जान्छौँ ।

0 अन्तमा युगदर्शन मिडियामार्फत भन्नुपर्ने छुटेका केही कुरा छन् ?

– युगदर्शन मिडियाले जनताको बिचमा जनताको आवाज, चाहना र समस्या निरन्तर उठाइरहेको छ । हामी यसको सराहना गर्छौँ । यो मिडिया यसरी नै अगाडि बढ्दै जाओस् र जनताका समस्यालाई व्यापक रूपमा उठाओस् भन्ने शुभेच्छा व्यक्त गर्दछु ।