हेटौंडा, १ भदौ । बागमती प्रदेशका मुख्यमन्त्री इन्द्रबहादुर बानियाँले सोमबार पदबाट राजीनामा दिएका छन्। प्रदेशसभा बैठकमा विश्वासको मत लिने प्रस्ताव पेस गर्ने क्रममा उनले राजीनामा घोषणा गरेका हुन्।
नेकपा एमालेले सरकारलाई दिएको समर्थन फिर्ता लिएपछि संवैधानिक व्यवस्थाअनुसार बानियाँले विश्वासको मत लिनुपर्ने अवस्था आएको थियो। तर, आफ्नै दल नेपाली कांग्रेस र हाम्रो नेपाली पार्टीबाहेक अन्य दलको समर्थन नदेखिएपछि उनले राजीनामा दिएका हुन्।
बानियाँले राजीनामाअघि आफ्नो एक वर्षे कार्यकालमा सरकारले गरेका प्रमुख कामको २८ बुँदे प्रगति विवरण प्रस्तुत गरेका थिए ।
अब बागमतीमा नयाँ सरकार गठनको तयारी भएको छ। नेकपा र नेकपा एमालेबीचको गठबन्धनले सरकार बनाउने तयारी गरेका छन् भने भागबण्डाअनुसार एमालेले सरकारको नेतृत्व गर्नेछ। एमालेभित्र संसदीय दलका नेता जगन्नाथ थपलियाविरुद्ध अविश्वास प्रस्ताव दर्ता भएकाले त्यसको टुंगो लागेपछि भावी मुख्यमन्त्री चयन हुने बताइएको छ।
हाल १०४ सदस्यीय बागमती प्रदेशसभामा सरकार गठनका लागि ५३ सांसदको समर्थन आवश्यक छ।
