भारत । पाल्पा जिल्ला, रैनादेवी छहरा गाउँपालिका–४, समादी घर भई हाल भारतको हिसार (एमसी कोलोनी) मा बस्दै आएका राजन परियारको उपचारका लागि मूल प्रवाह हिसारले ८७ हजार भारतीय रुपैयाँ अर्थात् नेपाली एक लाख उन्चालिस हजार दुई सय रुपैयाँ आर्थिक सहयोग गरेको छ।
गत जुलाई २, २०२६ मा अचानक उच्च रक्तचापका कारण शरीरको आधा भाग पक्षघात (लकवा) भएपछि परियारलाई जिन्दल अस्पतालमा भर्ना गरिएको थियो। १३ दिनसम्म उपचार गरेपछि आर्थिक अभावका कारण परिवारले उनलाई घर फर्काएको थियो।
परियारको अवस्थाबारे जानकारी पाएपछि मूल प्रवाह नगर समिति हिसारको विशेष पहलमा अस्पतालको उपचार खर्चमा समेत विशेष छुट गराइएको थियो। साथै, अनलाइनमार्फत आर्थिक सहयोग संकलन अभियान सञ्चालन गरिएको थियो।
उक्त अभियानबाट संकलित रकम १३ अगस्त २०२६ का दिन पीडित परिवारलाई हस्तान्तरण गरिएको हो। रकम हस्तान्तरण कार्यक्रममा मूल प्रवाहका केन्द्रीय सदस्य एवं सुदूर पश्चिमोत्तर क्षेत्रीय अध्यक्ष तारा सोमरे, केन्द्रीय परिषद् सदस्य केहर सिंह घर्ती मगर, क्षेत्रीय सदस्यहरू सुरेश क्षेत्री, लालबहादुर चुदाली, नगर सदस्य विष्णु गौतम, क्षेत्रीय महिला सदस्य एवं हिसार महिला संयोजक दुर्गा ज्ञवाली तथा क्षेत्रीय सदस्य चन्द्रा सोमरेलगायतको सहभागिता रहेको थियो।
संकटको घडीमा आर्थिक सहयोग गर्ने सम्पूर्ण सहयोगदाताहरूप्रति मूल प्रवाह हिसारले आभार व्यक्त गरेको छ। सहयोग रकम प्राप्त गरेपछि पीडित परिवारले पनि मूल प्रवाह एकता समाजप्रति धन्यवाद व्यक्त गरेको छ।
