काठमाडौँ । नेकपा (मसाल) ले उमानन्द चालिसेप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८३ साउन १६ गते शनिबार शोकवक्तव्य जारी गर्दै मसालले चालिसेप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेको हो ।
गत ३५ वर्षदेखि पार्टीसदस्य रही मसालको आन्दोलन अगाडि बढाउन योगदान दिएको भन्दै मसालले उहाँको निधनबाट गम्भीर क्षति भएको बताएको छ ।
यस्तो छ, शोकमन्तव्यको पूर्ण पाठ :
“रुपन्देही जिल्ला कञ्चन नगरपालिका–२ निवासी कामरेड उमानन्द चालिसे (का. उमेश) को २०८३ साउन १२ गते मृत्यु भएको छ । हामीले उहाँको मृत्युप्रति गहिरो दु:ख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
कामरेड उमानन्द हाम्रो पार्टीको सदस्य हुनुहुन्थ्यो । उहाँ विगत ३५ वर्षदेखि हाम्रो पार्टीको सदस्य भएर आफ्नो जिम्मेवारी पूरा गर्नुभएको थियो । उहाँले लामो समयसम्म भारतस्थित नेपालीहरूको लोकप्रिय सङ्गठन मूल प्रवाह अखिल भारत नेपाली एकता समाजमा आबद्ध भएर प्रवासी नेपालीहरूको हकहितका लागि सङ्घर्ष गर्दै आउनुभएको थियो । जिल्ला कमिटी तहमा रहेर उहाँले हाम्रो पार्टीको आन्दोलनलाई अगाडि बढाउन गहन जिम्मेवारी वहन गर्नुभएको थियो । गत साल मात्र उहाँ सरुवा भएर स्वदेश फर्कनुभएको थियो । उहाँ हाम्रो पार्टीको अनुशासित, प्रतिबद्ध, जुझारु र लगनशील सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
जैमिनी नगरपालिका–७ जैदी रोहोटे, बागलुङ निवासी भविश्वर उपाध्यायका नाती तथा कोपिलामणि उपाध्यायका ५६ वर्षीय छोरा उमानन्द चालिसे पछिल्लो समयमा रुपन्देहीको कञ्चन गाउँपालिकामा बसोवास गर्दै आउनुभएको थियो । उपचारको क्रममा चितवनस्थित भरतपुर अस्पतालमा उहाँको निधन भएको थियो ।
