काठमाडौँ । नेपाली कङ्ग्रेसका वरिष्ठ नेता गोपालमान श्रेष्ठको ८३ वर्षको उमेरमा निधन भएको छ । ललितपुरको जावलाखेलस्थित हेलिअस हस्पिटलमा उपचारका क्रममा २०८३ साउनन १२ गते मङ्गलबार उनको निधन भएको हो ।
कङ्ग्रेस कार्यवाहक मुख्य सचिव कृष्णप्रसाद दुलालका अनुसार श्रेष्ठको शव बुधबार बिहान ८ बजेदेखि ११ बजेसम्म पार्टी कार्यालय सानेपामा श्रद्धाञ्जलीको लागि राखिनेछ । त्यसपछि शवयात्रासहित पशुपति आर्यघाटमा उनको दाहसंस्कार गरिनेछ ।
नेता श्रेष्ठ केही समयदेखि हेलियस अस्पतालमा उपचाररत थिए । सोही अस्पतालमा उनको निधन भएको हो।
श्रेष्ठलाई हालै कङ्ग्रेसले वरिष्ठ नेता बनाएको थियो । श्रेष्ठले पार्टीमा गरेको योगदानअनुसार सम्मानसहित उनलाई वरिष्ठ नेता बनाइएको थियो । उनी गत पुसमा भएको विशेष महाधिवेशन उद्घाटन सत्रमा पनि सहभागी रहेका थिए ।
श्रेष्ठ विगत एक वर्षदेखि क्यान्सरबाट पीडित थिए । उनको भारत र नेपालका विभिन्न अस्पतालमा उपचारसमेत गरिएको थियो ।
श्रेष्ठ स्याङ्जाबाट पटकपटक सांसद निर्वाचित भएका थिए । उनी भौतिक योजना, वन, उद्योग, शिक्षालगायत मन्त्रीसमेत बनेका थिए । उनी विभिन्न समयमा गरी पाँच वर्ष जेलसमेत परेका थिए ।
श्रेष्ठले नेपाली कङ्ग्रेस प्रजातान्त्रिकको कार्यवाहक सभापतिसमेत रहेर काम गरेका थिए ।
