काठमाडौँ, साउन २ । भारतको राजधानी नयाँ दिल्लीस्थित जन्तर–मन्तरमा विगत २० दिनदेखि अनिश्चितकालीन अनशनमा बसेका वातावरण अभियन्ता तथा शिक्षाविद् सोनम वाङ्चुकलाई दिल्ली प्रहरीले बल प्रयोग गर्दै नियन्त्रणमा लिएको विविसी हिन्दीले जनाएको छ ।
विविसी हिन्दीले सामाजिक सञ्जालमा सार्वजनिक गरेको भिडियो सन्देशमा वाङ्चुकले आफूलाई प्रहरीले जबर्जस्ती अनशनस्थलबाट उठाएर लगेपछि दुर्व्यवहार गरेको दाबी गरेका छन् । उनले प्रहरीबाट कुटपिट भएको, आफूलाई कोठाभित्र थुनेर राखिएको तथा बाहिर निस्कन नदिएको आरोप पनि लगाएका छन् ।
वाङ्चुकका अनुसार घटनाका क्रममा अनशनस्थलमा रहेका विद्यार्थी तथा समर्थकमाथि समेत बल प्रयोग गरिएको थियो । विदेशबाट स्वदेश फर्किएका केही विद्यार्थीहरूलाई पनि सडकमा तानेर कुटपिट गरिएको उनले बताएका छन् ।
उनले सहयोगका लागि चिच्याउने प्रयास गर्दा प्रहरीहरूले मुख थुनेको र धम्कीपूर्ण व्यवहार गरेको आरोप लगाएका छन् । घटनाप्रति उनले गम्भीर आपत्ति जनाउँदै शान्तिपूर्ण आन्दोलनमाथि दमन गरिएको बताएका छन् ।
यस घटनाबारे दिल्ली प्रहरीले औपचारिक प्रतिक्रिया सार्वजनिक गरेको छैन ।
