लक्ष्मण बेल्बासे ##

इसारा गर्ने अरू कोही
पर्दापछाडि झनै कोही
मैदानमा तिमी किन ओई ?

देख्नेले तिमीलाई देखेँ
बुझ्नेले तिमीलाई बुझे
जसले तिमीलाई जे बुझे
त्यो तिमी थिएनौँ
थाहा त थियो
तिमी बाघ होइनौँ
तर बाघको छाला ओढेर
किन आयौ ?

नाटक मञ्चन हुँदै थियो
पर्दा झर्नै लागेको थियो
के भनौँ
तिम्रो ओढ्ने सर्दै थियो
नबुझ्नेले पनि हेर्दै थियो
एकछिनमै पर्दा खुलेजस्तै
तिमी खुल्दै थियौ
मैदानमा अब बाघ
आधा बाघ आधा स्याल हुँदै थियो
पर्दा झर्दै गर्दा परिचय खुल्दै थियो

तिमी त खहरे उर्लियौ
यहाँ टापुकै अस्तित्व मेटिने भयो
तिमी समुद्र त हैन
नदीसम्मै पुग्छौ–पुग्दैनौ
तर यहाँ गाउँकै सीमा बदलिने भयो
तर पनि तिम्रो खोल
पूरै उध्रेको छैन
भोटेकुकुर अझै भुक्न आँटेको छैन

तिम्रो खोल सबै झर्दा
पर्दा पनि झरिसकेको छ
मञ्चभरि बत्ती बाल्दा पनि
मनको बत्ती निभेको छ
पर्दा झरेको छ
नाटक सकिएको छ

तिमीलाई देखेर
भेडा पनि तर्किएका छन्
भ्या भ्या गर्नेजति
गोठतिरै फर्किएका छन्
तिम्रा पनि खुट्टा लर्किएका छन्
तर पनि भोटेकुकुर
तिमीतिरै फर्किएका छन्
भनिन्छ– ढुङ्गा बगेर शालिग्राम बन्छ
यहाँ त शालिग्राम बगेर
ढुङ्गा देखिएको छ
के भनौ खोई ?
तिमी पनि कसरी खेलौना भयौ ?
यति बलियो तिमी
त्यान्द्रोले चल्ने कसरी भयौ ?