काठमाडौँ, ३० जेठ । संविधान संशोधनको बहस चलिरहेका बेला महिला तथा दलित समुदायको राजनीतिक प्रतिनिधित्व सुनिश्चित गर्ने उद्देश्यले छुट्टै निर्वाचन क्षेत्र निर्धारणसम्बन्धी विषयमा अन्तरक्रिया कार्यक्रम आयोजना गरिने भएको छ ।
अखिल नेपाल महिला संघ केन्द्रीय समिति र जातीय समता समाज केन्द्रीय समितिको संयुक्त आयोजनामा हुने उक्त अन्तरक्रिया कार्यक्रम आज जेठ ३० गते शनिबार दिउँसो १ बजेदेखि बागबजार स्थित हार्दिक होटेलको सभाहलमा आयोजना हुने जनाइएको छ ।
कार्यक्रममा संविधान संशोधनका सन्दर्भमा महिला तथा दलित समुदायको प्रतिनिधित्व, समावेशी लोकतन्त्रको सुदृढीकरण, निर्वाचन प्रणालीमा सुधार तथा छुट्टै निर्वाचन क्षेत्र निर्धारणको आवश्यकता र सम्भावनाबारे छलफल गरिने आयोजकले जनाएको छ ।
आयोजक संस्थाहरूका अनुसार संविधान कार्यान्वयनको एक दशक नजिकिँदै गर्दा राजनीतिक तथा संवैधानिक संरचनामा महिला र दलित समुदायको प्रभावकारी सहभागिताका विषयमा राष्ट्रिय बहस आवश्यक रहेको निष्कर्षसहित कार्यक्रम आयोजना गरिएको हो ।
अन्तरक्रिया कार्यक्रममा विभिन्न राजनीतिक दलका प्रतिनिधि, संविधानविद्, अधिकारकर्मी, महिला तथा दलित आन्दोलनका अगुवा, नागरिक समाजका प्रतिनिधि तथा सरोकारवालाहरूको सहभागिता रहने अपेक्षा गरिएको छ ।
कार्यक्रमले संविधान संशोधनसम्बन्धी चलिरहेको राष्ट्रिय बहसमा महिला र दलित समुदायको दृष्टिकोणलाई थप सशक्त रूपमा उठान गर्ने तथा समावेशी प्रतिनिधित्वका विषयमा ठोस सुझाव प्रस्तुत गर्ने विश्वास आयोजकले व्यक्त गरेका छन् ।
