काठमाडौँ । नेकपा (मसाल) का प्रवक्ता रामप्रकाश पुरीले सुकुम्वासी र अव्यवस्थित बसोबासीले तत्कालै सङ्घर्षको कार्यक्रम घोषणा गर्नुपर्ने आवश्यकतामा जोड दिनुभएको छ ।
तीन किसान सङ्गठनले २०८३ जेठ २७ गते बुधबार अनामनगरमा आयोजित अन्तरक्रिया कार्यक्रममा मन्तव्य राख्दै उहाँले सो आवश्यकतामा जोड दिनुभएको हो ।
‘तपाईंहरूले अहिले जे गर्नुभएको छ, त्यो ठिक छ’ उहाँले भन्नुभयो– ‘अब यसको आधारमा तपाईंहरूले तत्कालै सङ्घर्षको कार्यक्रम घोषणा गर्नुपर्छ ।’
तत्कालै कठोर कार्यक्रमको घोषणा गर्न नसकिए पनि यही अन्तरक्रिया कार्यक्रमलाई जिल्लास्तरमा पुर्याउनुपर्ने उहाँको सुझाव थियो ।
उहाँले भन्नुभयो– ‘हामीले सुकुम्वासी बस्तीमा गएर तथा उनीहरूका सङ्गठनलाई सहभागी बनाएर आन्दोलनका कार्यक्रम सञ्चालन गर्नुपर्दछ ।’
देशमा थुप्रै कम्युनिस्ट वा वामपन्थी पार्टी हुँदाहुँदै पनि सुकुम्वासी तथा अव्यवस्थित बसोबासीले समस्या व्यहोर्नुपरेको सन्दर्भमा उहाँले मुख्यत: साङ्गठनिक कमजोरीकै कारण त्यसो गर्न नसकिएको बताउनुभयो ।
सुकुम्वासी तथा अव्यवस्थित बसोबासीको पक्षमा सङ्घर्ष गर्न तीन राजनीतिक दलमाझ कुनै समस्या नरहेको उहाँको भनाइ थियो ।
अर्कोतर्फ सुकुम्वासी तथा अव्यवस्थित बसोबासीलाई ‘यिनीहरू हाम्रा भोटर होइनन्’ भन्ने मनोवृत्तिकै कारण अहिलेसम्म उनीहरूको पक्षमा सशक्त आन्दोलन उठ्न नसकेको उहाँको विचार थियो ।
जेनजी आन्दोलनबाट साङ्गठनिक रूपमा नेपालको कम्युनिस्ट आन्दोलनसमेत धरापमा परेको स्पष्ट पार्दै उहाँले भन्नुभयो– ‘जेनजी आन्दोलनको ठुलो असर नेपालको कम्युनिस्ट आन्दोलनमा पर्यो । त्यही कारणले गर्दा सुकुम्वासी तथा अव्यवस्थित बसोबासीको पक्षमा कम्युनिस्टले सशक्त आन्दोलन उठाउन सकेनन् ।’
ठुला भनिएका वामपन्थी पार्टीमा सही विचार र राजनीतिक विवेक नभएकाले सुकुम्वासीमाथि ज्यादती हुँदा आन्दोलन उठाउन नसकेको उहाँको बुझाइ थियो ।
निष्कर्षमा उहाँले भन्नुभयो– ‘सङ्घर्ष, सङ्घर्ष र सङ्घर्षको विकल्प छैन । त्यसैले सुकुम्वासी र अव्यवस्थित बसोबासीको आन्दोलन उठाउनुको विकल्प छैन ।’
पहिलेपहिलेका सरकार अमेरिकापरस्त रहने गरेकोमा अहिलेको सरकार अमेरिकाको दलाल भएको कठोर टिप्पणी उहाँले गर्नुभयो ।
सरकारको यस्तो चरित्रका विरुद्ध सङ्घर्ष, आन्दोलनको विकल्प नरहेको उहाँको ठम्याइ थियो ।
