काठमाडौं । नेपाल कम्युनिष्ट पार्टी (मसाल) ले सर्वोच्च अदालतले श्रीमती हत्याको आरोपमा सर्वस्व सहित जन्म कैदको जेल सजाय भोगिरहेका पूर्व डिआइजी रञ्जन कोइरालालाई उन्मुक्ति दिएकोप्रति आपत्ति जनाएको छ । त्यो निर्णयले जनताको न्यायपालिकाप्रतिको विश्वास र भरोसालाई खतम पार्ने काम गरेको मसालको ठहर छ ।
मसालका प्रवक्ता रामप्रकाश पुरीले प्रेशित गर्नुभएको वक्तव्यमा भ्रष्टाचारी र बिभिन्न विषयमा सजाय पाएका दोषीहरूलाई उन्मुक्ति दिने निर्णयले देशको सम्पूर्ण न्यायप्रणाली नै ध्वस्त हुँदै गइरहेको कुरातर्फ संकेत गरेको बताउनुभएको छ ।
‘विगत केही वर्षदेखि सर्वोच्च अदालतमा न्याय परिषद, न्यायाधीश, प्रधानन्यायाधीश आदिका प्रवृत्ति, निर्णय र कामबारे प्रश्नहरू उठ्ने गरेका छन् । त्यो कारणले सर्वोच्च अदालतको गरिमापूर्ण परम्परा ध्वस्त हुँदै गइरहेको अवस्थामा अहिले कोइरालासम्बन्धी गरिएको निर्णयले सर्वोच्च अदालतको गिर्दो छविलाई उत्कर्षमा पुर्याउने काम गरेको छ’ वक्तव्यमा भनिएको छ, ‘अन्तिम न्यायको फैसला र सम्पादन हुने सर्वोच्च अदालतको छवि धुमिल्याउने काममा भ्रष्ट प्रवृत्तिका न्यायधिशका कार्यशैली, विवादित निर्णय र फैसलाहरू नै जिम्मेवार रहेका छन् ।’
अहिले पूर्व डिआइजी कोइरालाको विषयमा सर्वोच्च अदालतले गरेको निर्णय भ्रष्टाचारी, अस्वस्थ र पक्षपाती कार्यशैलीको नमूनाको रूपमा अगाडि आएको वक्तव्यमा उल्लेख छ ।
‘यसले न्यायप्रणालीको सम्पूर्ण संयन्त्रलाई धुमिल बनाउनका साथै सर्वोच्च अदालतमा हुँदै गइरहेका गलत निर्णय र गिर्दो छविको पनि उजागर गरेको छ । त्यसले देशको न्यायप्रणालीका मूल्य र मान्यतालाई नै चुनौति दिएकाले त्यो निर्णय हामीले विरोध गर्दछौँ’ वक्तव्यमा भनिएको छ ।
वक्तव्यको पूर्ण पाठको लागि यो पढ्नुहोस्ः योजनाविहीन कार्यशैलीले कोरोनाको समस्या बल्झने खतराः मसाल
