काठमाडौं । अब नेपालमा हवाई यात्रा गर्दा सबैभन्दा छोटो दुरीको हवाई यात्रा ३३ सय निश्चित भएको छ । वायुसेवा सञ्चालक संघले बुधबार बढेको इन्धनको मूल्य (सरचार्ज) समायोजन गरेर नयाँ भाडादर कायम गरेसँगै नेपालको हवाई यात्रामा पनि इजाफा आएको हो ।
नयाँ भाडादर अनुसार फ्युल सरचार्ज बापत विभिन्न रुटमा १ हजार ६०० रुपैयाँदेखि ५ हजार ४८० रुपैयाँसम्म भाडा बढेको छ । काठमाडौंबाट धनगढीको फ्युल सरचार्जमा ५ हजार ४८० रुपैयाँ वृद्धि गरिएको छ ।
त्यस्तै, सुर्खेतका लागि ४ हजार २८५ रुपैयाँ, नेपालगञ्जका लागि ४ हजार ४५ रुपैयाँ, भद्रपुरका लागि ३ हजार ७२५ रुपैयाँ, भैरहवाको लागि २ हजार ५५५ रुपैयाँ, विराटनगरका लागि २ हजार ९८० रुपैयाँ, पोखराका लागि १ हजार ९७० रुपैयाँ र जनकपुरका लागि १ हजार ६०० रुपैयाँ सरचार्ज निर्धारण गरिएको छ ।
सञ्चालक संघका अनुसार अब काठमाडौंबाट ट्रंक रुटका जहाज चढ्न न्यूनतम ३३ सय ४४ रुपैयाँदेखि देखि अधिकतम २३ हजार ५९ रुपैयाँसम्म लाग्ने भएको छ । काठमाडौं सिमराका लागि न्यूनतम र काठमाडौं धनगढीका लागि अहिले सबैभन्दा धेरै भाडा निर्धारण गरिएको छ ।
