राष्ट्रिय जनमोर्चा नीति, सिद्धान्त र नैतिकताको कसिमा सबैभन्दा ठूलो तर सांगठनिक रुपमा सानो भए पनि देश र जनताको पक्षमा यसको महत्वपूर्ण भूमिका रहँदै आएको छ । जनतामाथि हत्या, हिंसा, दमन र उत्पीडन हुँदा ठूला भनिएका शक्तिहरू भागेर सदरमुकाम र राजधानीमा केन्द्रित हुँदा गाउँगाउँमा पसेर जनतामाथि भएका दमन र उत्पीडनका विरुद्ध डटेर मुकाविला गरेको हाम्रो पार्टीको इतिहास छ ।
संघीयता नामको विषालु सुनामीले देशका ठूलाठूला भनिएका राजनीतिक शक्तिहरूलाई बडार्दा समेत त्यसका विरुद्ध सतिसाल बनेर खडा भएको विगत हाम्रो सामु छ । पुराना वा नयाँ अन्य सबै राजनीतिक दलहरू भ्रष्टाचारमा सामेल भएको यथार्थ तस्विर हाम्रो सामु छ । तर त्यसको बाबजुद लामो समय संसदमा रहँदा लेखा समिति जस्तो महत्वपूर्ण निकायको सभापति हुँदा, सरकारमा सामेल हुँदा तथा विभिन्न स्थानीय तहहरूको नेतृत्व गर्दा समेत हाम्रो पार्टीले निश्कलंक छवि कायम राख्न सफल भएको उदाहरण जगजाहेर नै छ ।
हाम्रो पार्टीले गरेको कैयौँ राजनीतिक भविष्यवाणीहरू सत्य सवित हुँदै आएका छन् । अहिलेको चुनावी परिणाम पछि देश साम्राज्यवादीहरूको युद्ध भूमि बन्ने संभावना रहेको कुरा हाम्रो पार्टीले व्यक्त गरेको छ । यस प्रकारको खतराका विरुद्ध संझौताहिन प्रकारले संघर्ष गर्ने नैतिक वल हाम्रो पार्टीसँग मात्र छ ।
कामरेडहरू,
स्वतन्त्रता र समानताको लामो र कठिन यात्रा तय गरेर अगाडि बढिरहेको हाम्रा लागि चुनावी परिणामबाट निराश हुनुपर्ने कुनै कारण छैन । त्यसकारण आउनुहोस्, यस पटक फेरी हाम्रो पार्टीको सही नीति, नेतृत्व र नैतिक वलका आधारमा साम्राज्यवादी ज्वारभाटाका विरुद्ध संघर्ष गर्ने तयारीमा जुटौँ ।
