भियना । अन्तर्राष्ट्रिय आणविक ऊर्जा निकाय (आइएइए) ले इरानमा अमेरिका र इजरायलको आक्रमणपछि कुनै पनि आणविक प्रतिष्ठानमा क्षति पुगेको वा क्षति भएको कुनै सङ्केत नभेटिएको खुलासा गरेको छ ।
संयुक्त राष्ट्र सङ्घको आणविक निगरानी संस्थाका प्रमुखले सोमबार सो जानकारी गराएका हुन् ।
आइएइएका लागि इरानी प्रतिनिधि रेजा नाजाफीले प्रमुख आणविक स्थल नातान्जमा आक्रमण भएको बताए ।
इरानसम्बन्धी निकायको बोर्ड अफ गभर्नरको असाधारणसत्रको उद्घाटन गर्दै आइएइएका प्रमुख राफेल ग्रोसीले सबै पक्षलाई तनाव बढ्नबाट बच्न अधिकतम संयम अपनाउन आग्रह गरे ।
‘इरानमा आणविक प्रतिष्ठानको स्थितिको बारेमा अहिलेसम्म हामीसँग बुसहर आणविक ऊर्जा संयन्त्र, तेहरान रिसर्च रिएक्टर वा अन्य आणविक इन्धनचक्र सुविधासहित कुनै पनि परमाणु प्रतिष्ठान क्षतिग्रस्त भएको वा प्रभावित भएको कुनै सङ्केत भेटिएको छैन’ उनले भने ।
आइएइएले इरानी आणविक नियामक अधिकारीसँग सम्पर्क गर्ने प्रयास गरिरहेको बताएको छ ।
‘हामी आशा गर्दछौँ, सञ्चारको यो अपरिहार्य मार्ग सकेसम्म चाँडो पुन: स्थापित हुनेछ’ उनले थपे । (रासस/एएफपी)
