भक्त विश्वकर्मा ##

यसपटकको चुनावमा पनि
भाइरललाई नै सहयोग गरौँ
भोजभतेर खुवाउनेलाई नै बोलाऊँ
मासुमदिरा खुवाउनेलाई नै जिताऊँ
पेट्रोल हालिदिने पार्टीको जुलुसमै जाऊँ

यसपटक फेरि
भ्रष्टाचारीलाई नै चुनौँ
देश बेच्नेलाई नै भोट गरौँ
कलकारखाना ध्वस्त पार्नेलाई
मतदान गरिरहौँ
साम्राज्यवादीका भरिया पार्टीलाई
जिताएर पठाऊँ
सहकारी ठगी गर्ने लुसिफरको
पार्टीलाई सरकारमा पठाऊँ
सिंहदरबार जलाउनेलाई चुनौँ
एमसिसीका मतियारलाई
सत्ताको बागडोर समात्न दिइरहौँ
नयाँ नयाँ सन्की महाराजलाई
सत्ता हस्तान्तरण गरौँ
नोटमा भोट बदलौँ
प्रतिगामीलाई फेरि टाउको
उठाउन मदत गरौँ
बरु ३६४ दिन सरापी बसौँ
तर बारम्बार उनैलाई जिताइरहौँ

पहिलाजस्तै यस पटक पनि
जनताको पक्षमा सधैँ बोल्ने
पार्टीलाई हराऔँ
भ्रष्टाचार कहिल्यै नगर्ने पार्टीलाई
भोट नहालौँ
देश बचाउन सधैँ सङ्घर्ष गरिरहने
भुइँमान्छेको पार्टीलाई मतदान नगरौँ
सही र सत्य एजेन्डा भएको पार्टीलाई
सानो नै राखौँ
प्रगतिशील र निष्ठावान् पार्टीलाई
हराउँदै जाऊँ
देशभक्त क्रान्तिकारी पार्टीलाई
चुन्दै नचुनौँ
किनकि यो पार्टीलाई जितायो भने
सङ्घीयताको खारेज हुन्छ
गुण्डाराज पार्टीको भर्तीकेन्द्र
बन्द हुन्छ
शिक्षा, स्वास्थ्य नि:शुल्क हुन्छ
असमान सबै सन्धि खारेज हुन्छ
कलकारखाना खुल्छ
देशमै स्वरोजगार सुरु हुन्छ
देश आत्मनिर्भर हुन्छ
देश विकास हुन्छ
त्यो किन हुन दिनूँ
पैसा नबाँड्ने, पेट्रोल नदिने
मदिरा पनि नपिलाउने पार्टीलाई
किन भोट दिनूँ ?

त्यसैले फेरि राजमोलाई हराऔँ
गिलास चिह्नमा मतदान नगरौँ
देश भड्खालोमा हाल्ने पार्टीलाई जिताऊँ
भ्रष्टाचारी, गद्दारी सन्की, ठगलाई
दुईतिहाइले जिताऊँ
नेपालको नामनिसान मेटाइदिऊँ
बरु देश युक्रेन बनाऊँ
सुडान बनाऊँ
सत्यलाई गुमराहमा नै राखिरहौँ
डिजिटल लतमा फसिरहौँ
अनि देश मज्जाले विकास हुन्छ
विदेशी सेनाले टुडिखेलमा परेड खेल्छ
देश पूर्ण उपनिवेशमा जान्छ
यसपटक पनि यसो गरौँ
अर्काे पटक पनि यसै गरौँला