काठमाडौँ । राष्ट्रिय जनमोर्चाले धादिङ बस दुर्घटनाप्रति दु:ख व्यक्त गर्दै मृतकप्रति श्रद्धाञ्जली, शोकसन्तप्त परिवारप्रति समवेदना र घाइतेको शीघ्र स्वास्थ्यलाभको कामनासँगै क्षतिपूर्तिको मागसमेत गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८२ फागुन ११ गते सोमबार प्रेसवक्तव्य जारी गर्दै राजमोले सो माग गरेको हो ।
वक्तव्यमा तत्कालै उक्त घटनाको छानबिन गरेर दुर्घटना न्यूनीकरणको ठोस उपाय गर्न सरकारसित माग गरेको छ ।
यस्तो छ, वक्तव्यको पूर्ण पाठ :
“२०८२ फागुन १० गने साँझ पोखरादेखि काठमाडौँ आउँदै गरेको ग२ ख१४२१ नम्बरको बस फागुन ११ गते मध्यराति १ बजेतिर धादिङको चरौँदीमा दुर्घटना हुँदा हालसम्म १९ जनाको निधन भएको र थुप्रै यात्री गम्भीर घाइते भएको घटनाप्रति राष्ट्रिय जनमोर्चा दु:ख व्यक्त गर्दछ । राष्ट्रिय जनमोर्चा मृतकप्रति श्रद्धाञ्जली, मृतकका परिवारप्रति समवेदना, घाइतेको शीघ्र स्वास्थ्यलाभको कामना व्यक्त गर्दै मृतकका परिवारलाई क्षतिपूर्ति तथा घाइतेको नि:शुल्क उपचारको व्यवस्था गर्न सरकारसित माग गर्दछ ।
देशमा पटकपटक सडक दुर्घटना हुने गरेका छन् । त्यसले गर्दा ठुलो सङ्ख्यामा जनधनको क्षति हुने गरेको छ । यस्तो किन भइरहेको छ । सरकारले सडक दुर्घटना न्यूनीकरण गर्न किन सकिरहेको छैन ? हाम्रो पार्टी तत्कालै यस घटनाको उच्चस्तरीय छानबिन गरी कारण पत्ता लगाउन तथा यसरी आगामी समयमा दुर्घटना न्यूनीकरण गर्नेतर्फ सरकारको ध्यानाकर्षण गराउन चाहान्छ ।”
