धादिङबेसी । धादिङमा सोमबार बिहान भएको बस दुर्घटनामा मृत्यु हुनेको सङ्ख्या १९ पुगेको छ भने सो घटनाको छानबिन गृहमन्त्रालयद्वारा गठन गरिने समितिले गर्नेभएको छ ।
दुर्घटनामा घाइते भएका एक जनाको काठमाडौँस्थित ट्रमा सेन्टरमा मृत्यु भएपछि मृतकको सङ्ख्या १८ पुगेको हो ।
काठमाडौँ प्रहरीका अनुसार ३२ वर्षीय एक पुरुषको उपचारका क्रममा मृत्यु भएको हो । उनको परिचय खुलेको छैन ।
दुर्घटनापछि २३ जनालाई काठमाडौँ ल्याइएको थियो । तीमध्ये १० जनालाई नेसनल अस्पताल कलङ्की र १३ जनालाई ट्रमा सेन्टरमा लगिएको थियो ।
पोखराबाट काठमाडौँ आउँदै गरेको ग२ ख१४२१ नम्बरको बस सोमबार करिब साढे १ बजे धादिङको बेनिघाट रोराङ गाउँपालिका–५ भैँसीगौडास्थित पृथ्वी राजमार्ग सडकखण्डबाट त्रिशूली नदी किनारमा खसेको थियो । दुर्घटनामा १७ जनाको घटनास्थलमै मृत्यु भएको थियो ।
सशस्त्र प्रहरी बलका अनुसार बसमा कुल ४५ जना सवार थिए । तीमध्ये २६ जना घाइते भएका छन् । बाँकी घाइतेको स्थानीय अस्पतालमा उपचार भइरहेको छ । उक्त बस आइतबार बेलुकी ७ बजे पोखराबाट छुटेको थियो ।
गृहको छानबिन समिति
धादिङमा बस दुर्घटनाको विषयमा गृह मन्त्रालयमा बैठक बसेर छानबिन समिति बनाउने बताइएको छ तर समितिको संयोजक टुङ्गिएको छैन ।
सोमबार बिहान मन्त्रालयमा बैठक बसेर छानबिन समिति गठन गर्ने निर्णय भएको मन्त्रालयले जानकारी दिएको छ ।
बैठकमा गृहमन्त्री ओमप्रकाश अर्याल, गृहसचिव, भौतिक पूर्वाधार सचिव, सडक विभागका महानिर्देशक, यातायात व्यवसायी, सुरक्षा अंगका प्रमुख लगायतको उपस्थिति रहेको थियो ।
धादिङ प्रहरीका सूचना अधिकारी प्रकाश दाहालका अनुसार मृत्यु हुनेमा बेलायतका २४ वर्षीय स्टिवर्ट डोमिनिक इथान, ३४ वर्षीय चिनियाँ नागरिक जियाङ चोनुम र भारत, उत्तर प्रदेश प्रान्त, बसहरी बहराइच घर भएका वर्ष ३२ का मनिष शुक्ला छन् ।
दुर्घटनामा मृत्यु भएका नेपालीहरू :
१. कास्की जिल्ला पोखरा महानगरपालिका वडा नं ३० बस्ने अन्दाजी वर्ष ४० का विवेक बस्तोला
२. स्याङ्जा जिल्ला वालिङ–१४ घर भई हाल जिल्ला काठमाडौं, नागार्जुन नगरपालिका वडा नं ६ बस्ने वर्ष ६३ का चन्द्रबहादुर कुँवर
३. तनहुँ जिल्ला व्यास नगरपालिका वडा नं ४ बस्ने अन्दाजी वर्ष ४० का ओमकुमार मल्ल
४. धादिङ जिल्ला साविक सल्यानकोट–८ हाल त्रिपुरासुन्दरी गाउँपालिका–४ बस्ने अन्दाजी वर्ष ३० का इन्जिनियर ठकुरी
५. तनहुँ जिल्ला शुक्लागण्डकी नगरपालिका–७, मालेबगर बस्ने अन्दाजी वर्ष ५५ की विष्णुमाया ढकाल
६. काठमाडौं जिल्ला काडमाडौ महानगरपालिका बौद्ध टुसाल बस्ने अन्दाजी वर्ष ४२ का लोबसाङ गोले
६. तनहुँ जिल्ला भीमनगर नगरपालिका वडा नं ६ बस्ने अन्दाजी वर्ष ४६ का हरिप्रसाद सिग्देल
८. पाल्पा जिल्ला तानसेन नगरपालिका वडा नं २ बस्ने अन्दाजी वर्ष ५५ का नबिन्द्र श्रेष्ठ
९. तनहुँ जिल्ला शुक्लागण्डकी गाउँपालिका वडा नं ७ बस्ने वर्ष ६३ का रुद्रप्रसाद ढकाल
१०. तनहुँ जिल्ला शुक्लागण्डकी गाउँपालिका वडा नं २ बस्ने वर्ष २० की अर्चना पौडेल
११. कास्की जिल्ला पोखरा महानगरपालिका वडा नं-१४, चाउथे बस्ने वर्ष २१ की अञ्जली क्षेत्री
१२. कास्की जिल्ला माछापुच्छ्रे गाउँपालिका वडा नं ३ बस्ने वर्ष २१ का रोहित नेपाली
१३. स्याङ्जा जिल्ला पुतलीबजार नगरपालिका वडा नं ६ बस्ने वर्ष ४५ का धनश्याम सुवेदी
१४. काठमाडौं जिल्ला काठमाडौं महानगरपालिका वडा नं ३२, बुद्धनगर बस्ने वर्ष ३३ की अनिशा महर्जन
१५. मोरङ जिल्ला उर्लाबारी–१ स्थायी ठेगाना भएकी वर्ष २७ की हिरा चौधरी
१६. जिल्ला कास्की, पोखरा महानगरपालिका वडा नं- १९ बस्ने वर्ष २६ का सुजित नेपाली
