काठमाडौँ । विश्वभरि नै लोकप्रिय भिडियो स्ट्रिमिङ प्लेटफर्म युट्युब अवरुद्ध भएको छ । यससँगै यो प्राविधिक समस्या समाधान गर्न युट्युब लागिरहेको जानकारी प्राप्त भएको छ ।
अनलाइन आउटेज ट्र्याकिङ वेबसाइट ‘डाउनडिटेक्टर’ का अनुसार मङ्गलबार रातिदेखि समस्या सुरु भएको केही समयभित्रै दुई लाख ८० हजार बढी प्रयोगकर्ताले युट्युब नचलेको उजुरी दर्ता गराएका थिए ।
मुख्यगरी युट्युबको मोबाइल एपमा समस्या देखिए पनि धेरैले डेस्कटप वेबसाइटमा समेत अवरोध झेल्नुपरेको बताएका छन् । त्यस्तै, युट्युबको प्रिमियम सेवा ‘युट्युब टिभी’ मा पनि सात हजारभन्दा बढी गुनासा परेको बताइएको छ ।
अमेरिकाको न्युयोर्क, वासिङटन, सिकागो र लस एन्जलसजस्ता मुख्य सहरमा यसको प्रभाव सबैभन्दा बढी देखिएको छ ।
सेवामा अवरोध आएपछि युट्युबले एक आधिकारिक विज्ञप्ति जारी गर्दै प्रयोगकर्तामा परेको असुविधाप्रति ध्यानाकर्षण भएको बताएको छ । कम्पनीले आफ्ना प्राविधिक टोली यसबारे सजग रहेको र समस्या समाधानका लागि काम गरिरहेको बताएको छ तर यो सङ्कट के कारणले निम्तिएको हो भन्नेबारे कम्पनीले स्पष्ट पारेको छैन ।
सामाजिक सञ्जालमा प्रयोगकर्ताले आफ्ना समस्या साझा गर्दै युट्युब खोल्दा ‘ब्ल्याक स्क्रिन’ मात्र देखिने वा ‘समथिङ वेन्ट रङ’ भन्ने सन्देश आउने गरेको बताएका छन् ।
केहीले ठट्टा गर्दै युट्युबविनाको समय ‘संसारको अन्त्य’ भएको टिप्पणी गरेका छन् । कतिपयले खाना खाँदा भिडियो हेर्न नपाएको भन्दै आक्रोश पोखेका छन् ।
प्राविधिक विज्ञका अनुसार यस्तो अवस्थामा ब्राउजरको क्यास र कुकिज सफा गर्ने, भिपिएन बन्द गर्ने वा एप अपडेट गर्नेजस्ता उपाय अपनाउन सकिने भए पनि यो समस्या युट्युबकै सर्भरमा देखिएकाले प्रयोगकर्ताको तर्फबाट गरिने प्रयास तत्काल प्रभावकारी नहुने भनिएको छ ।