काठमाडौँ । निर्वाचन आयोगले गगन थापा नेतृत्वको विशेष महाधिवेशन पक्षधरलाई नेपाली कङ्ग्रेसको आधिकारिक मान्यता दिएको छ ।
२०८२ माघ २ गते शुक्रबार राजनीतिक दलसम्बन्धी ऐनको दफा ५१ अनुसार विवरण अद्यावधिक गर्दै आयोगले थापा पक्षलाई मान्यता दिने निर्णय गरेको हो ।
कार्यवाहक प्रमुख निर्वाचन आयुक्त रामप्रसाद भण्डारी र जानकी तुलाधरले थापाको पक्षमा निर्णय दिए ।
आयोगका सगुनशमशेर राणाले फरक मत राखेको बताइएको छ ।
पुस २७ देखि ३० सम्म काठमाडौँमा सम्पन्न विशेष महाधिवेशनले थापालाई सभापति निर्वाचित गरेको थियो ।
विशेष महाधिवेशनबाट भएको निर्णयअनुसार विवरण अद्यावधिक गर्न सभापति थापासहितका पदाधिकारीले बिहीबार आयोगमा निवेदन दिएका थिए ।
पूर्णबहादुर खड्का पक्षका नेताहरूले शुक्रबार बिहान आयोगमा निवेदन दिँदै आफूहरू आधिकारिक भएको दाबी गरेका थिए । त्यसपछि आयोगले नवनिर्वाचित पदाधिकारीलाई आयोगमा बोलाएको थियो ।
कङ्ग्रेसका दुवै पक्षको दाबीपछि आयोगले गगन पक्षलाई आधिकारिक कङ्ग्रेसको मान्यता दिएको हो ।
गगन पक्षले मान्यता पाएपछि अब चुनाव चिह्न रुख र चारतारे झन्डा पनि उनीहरूकै हुने भएको छ ।
खड्का पक्षलाई पार्टीको नाम र चुनाव चिह्न रोज्न दिइने भएको छ ।
