अङ्ग्रेजी नयाँ वर्ष २०२६ सुरु हुँदै गर्दा भियतनामका राष्ट्रपति निकोलस मदुरोलाई उनी पत्नीसहित अमेरिकाले आफ्नै निवासबाट गिरफ्तार गर्यो । यतिखेर अमेरिकाको अदालतमा उनीमाथि मुद्दा चलाइएको छ । दुवै जना अमेरिकी प्रहरीको हिरासतमा छन् । हालै बहालावाला राष्ट्रपति ट्रम्पले सामाजिक सञ्जालबाट आफूलाई भियतनामको राष्ट्रपतिसमेत घोषणा गरिसकेका छन् । उनको यस्तो साम्राज्यवादी महङ्खवाकाङ्क्षा यत्तिमा सीमित छैन, उनले डेनमार्कको सार्वभौमसत्ताभित्र रहेको ग्रिनल्यान्ड, पनामा नहर र क्यानडालाई पनि अमेरिकामा सामेल गर्ने बताइसकेका छन् । ट्रम्पका यस खालका गतिविधिले बताउँछ, यतिखेर अमेरिकी साम्राज्यवाद नग्न र उद्दण्ड भूमिकामा छ । अमेरिकाको यस खालको भूमिकाका कारण सम्पूर्ण मानव समाजको अस्तित्व खतरामा परेको देखिन्छ ।
भियतनाम प्रशस्त मात्रामा खनिज र पेट्रोलियम पदार्थ भएको मुलुक हो । अमेरिकाजस्ता साम्राज्यवादीले लामो समयदेखि त्यहाँ आँखा गाडिरहेका छन् तर भियतनामको चाभेज र बहालवाला मदुरो सरकारले त्यसका विरुद्ध बारम्बार कदम उठाउने गरेको थियो । अहिले अमेरिकाले आफ्ना पुँजीपतिलाई भियतनाममा पुँजीनिवेश गर्न आग्रह गर्दा उनीहरूले यसबारे ॅविचार गर्ने’ बताएका छन् । यसअघि दुई/दुई पटकसम्म अमेरिकी कम्पनीको भियतनामले राष्ट्रियकरण गरेकाले यसबारे ‘विचार’ गर्नुपर्ने उनीहरूको तर्क छ । यसबाट अमेरिकाले मदुरो वा भियतनामी राज्यसत्ताका विरुद्ध जुन लागुपदार्थ तस्करीको आरोप लगाइरहेको छ, त्यो मिथ्या भएको पुष्टि हुन्छ । मुख्यतः खनिज वा पेट्रोलियम पदार्थ दोहनको स्वार्थकै कारण अमेरिकाले भियतनामको सार्वभौमसत्तामाथि आक्रमण गरेको हो भन्नेबारे पुनर्विचार गर्नु आवश्यक देखिन्न ।
साम्राज्यवाद उत्पीडित राष्ट्र र जनताका जीवनमरणको दुस्मन हो । त्यसमध्ये पनि अमेरिकी साम्राज्यवाद मानव समाजकै दुस्मन हो । अमेरिकाको हालसम्मको नीति र व्यवहारले यो कुरा पुष्टि हुँदै गइरहेको छ । अहिले ग्रिनल्यान्ड, क्यानडाजस्ता देश प्रत्यक्ष रूपमा नै निसानामा छन् । अन्य देश उनीहरूको तुलनामा अप्रत्यक्ष निसानामा छन् । हाम्रो देश पनि अमेरिकाको निसानामा छ । मुख्यतः चीनलाई घेर्ने हिन्दप्रसान्त रणनीति कार्यान्वयनको क्रममा हामी निसानामा छौँ । त्यस क्रममा हाम्रा देशका शासकले एमसिसी पारित गरिसकेका छन् तर एसपिपी पारित नगरेका कारणले पुराना पार्टी अमेरिकी निसानामा छन् । यही क्रममा जेनजी परिघटना प्रायोजित गरेर संवैधानिक प्रकारले गठन भएको ओली सरकारलाई विघटन गरिएको छ । सम्भावना छ, देशको ठुलो दल भनिएको नेपाली कङ्ग्रेसभित्र पनि विग्रह उत्पन्न गरेर अमेरिकापरस्त जमात प्रभावशाली बनाइनेछ । यता महाराजगञ्जले नेपालमा अमेरिकी स्वार्थको पक्षमा “अमेरिकी युथ काउन्सिल” गठन गरेर अभियान सञ्चालन गरिरहेको छ । यसरी आज अमेरिकी साम्राज्यवाद विश्व मानव समाजका लागि खतराको रूपमा रहेको स्पष्ट छ ।
लेनिनले साम्राज्यवादलाई पुँजीवादको उच्चतम र मरणासन्न अवस्था बताएका छन् । त्यसको अर्थ हुन्छ, साम्राज्यवादको सकारात्मक दिशामा रूपान्तरण हुन सक्दैन । जसरी मानव समाज आदिम साम्यवादबाट दासयुग, सामन्तीयुग, पुँजीवादी युग हुँदै साम्राज्यवादमा पुगेको छ, अब यहाँभन्दा अर्को सकारात्मक विकल्प छैन । अब साम्राज्यवादको विकल्प समाजवाद नै हो । साम्राज्यवादले आफूलाई सुधार गर्न सबै सम्भावनालाई आफै समाप्त पारिरहेको छ । यस अर्थमा साम्राज्यवादले आफ्नो चिहान आफै खनिरहेको छ । चीन र रुस पनि साम्राज्यवादी देश हुन् तर उनीहरूको विरुद्ध रणनीतिक मोर्चाबन्दी गरेर अमेरिकाले स्वयम् साम्राज्यवादी गढलाई कमजोर बनाइरहेको छ । उत्पीडित राष्ट्र र त्यहाँ बसोबास गर्ने उत्पीडित जनता त त्यसको निसानामा पर्ने नै भए । यस्तो अवस्थामा विश्वशान्ति तथा मानव समाजको उन्नति, प्रगति र दीर्घायुका लागि अमेरिकी साम्राज्यवादको विरुद्ध विश्वव्यापी मोर्चाबन्दी आवश्यक छ । यतिखेर स्वयम् अमेरिका, भियतनाम, ग्रिनल्यान्ड, क्यानडालगायत विश्वभरि साम्राज्यवादका विरुद्ध जुन विरोध देखिएको छ, यसले साम्राज्यावादी मोर्चाबन्दी सुदृढ बन्दै गएको तथ्यलाई पनि बताउँछ ।
