काठमाडौँ । अमेरिकाले भेनेजुयलाको राजधानी काराकासको विभिन्न क्षेत्रमा विस्फोट र हमला गरेको छ । शनिबार बिहान राजधानी काराकासको सैन्य क्षेत्रमा हमला भएको हो ।
उक्त हमला अमेरिकाले गरेको भेनेजुएलाले दाबी छ । यससँगै भेनेजुयलाका राष्ट्रपति मादुरोले देशमा भएको विस्फोट र हमलापछि राष्ट्रिय आपतकाल घोषणा गरेका छन् ।
प्रत्यक्षदर्शीका अनुसार सहरको केन्द्रमा रहेको सैन्य हवाई अड्डा ला कार्लोटा र मुख्य सैन्य अड्डा फुयर्ते तिउना वरपर हमला भएका छन् ।
सो स्थानमा भएको भनिएको हमलामा विस्फोटका आवाज आएका छन् भने आकाशतर्फ धुवाँ उडिरहेको भिडिओ सामाजिक सञ्जालमा सार्वजनिक भएका छन् ।
अमेरिकी सञ्चारमाध्यम सी.बी.एस. न्युजले स्रोतको हवाला दिँदै ट्रम्प प्रशासनका अधिकारीलाई शनिबार बिहानै काराकासको आकाशमा विस्फोटको जानकारी रहेको जनाएको छ ।
अमेरिकी राष्ट्रपति डोनाल्ड ट्रम्पको प्रशासनले भेनेजुयलाका राष्ट्रपति निकोलस मादुरोमाथि पछिल्लो हप्तादेखि दबाब बढाइरहेका बेला भेनेजुएलामा हमला भएको देखिन्छ ।
ट्रम्प प्रशासनले मादुरोमाथि अमेरिकामा लागुऔषध तस्करी र आपराधिक गतिविधिमा संलग्न रहेको आरोप लगाउँदै आएको छ ।
यता, मादुरोले भने यी घटनालाई अमेरिकाले भेनेजुयलाका तेल र खनिज कब्जा गर्न खोजेको प्रयास भएको भन्दै निन्दा गरेका छन् ।
मादुरोले अमेरिकामाथि आफ्नो देशको स्रोतसाधन कब्जा गर्ने चालको आरोप लगाएका छन् भने देशभित्र सुरक्षा कडा गर्ने निर्देशन दिएका छन् ।
