काठमाडौं । कुख्यात भारतीय गुन्डा नाइके विकास दुबे मुठभेडमा मारिएको उत्तर प्रदेश प्रहरीले बताएको छ । केही दिन अघि आठ जना प्रहरीको ज्यान लिएका दुबेलाई उज्जैनबाट कानपुर लग्दै गर्दा बाटोमै इन्काउन्टर गरिएको हो ।
प्रहरीका अनुसार प्रदेशको स्पेशल टास्क फोर्सले उज्जैनबाट सडक मार्गबाट दुबेलाई कानपुरतर्फ लग्दै गर्दा एउटा गाडी पल्टिएको थियो । त्यसपछि दुबेले भाग्ने प्रयास गरेको र गोली चलाउनु पर्ने अवस्था आउँदा उनको मृत्यु भएको प्रहरीको दाबी छ ।
प्रहरी अधिकारी मोहित अग्रवालका अनुसार घटनामा चार जना प्रहरी पनि घाइते भएका छन् । उनीहरूको कानुपरको सीएससी अस्पतालमा उपचार जारी रहेको बताइएको छ ।
दुबेले नेतृत्व गरेको एउटा आपराधिक समूहलाई गत शुक्रवार पक्राउ गर्न जाँदा आक्रमणमा परेर उत्तर प्रदेश राज्यको कानपुरमा आठ जनाको मृत्यु भएको थियो ।
उक्त घटनापछिको झन्डै एक सातादेखि फरार रहेका दुबेलाई मध्य प्रदेश राज्यको एउटा मन्दिरमा पक्राउ गरिएको हो । विकास दुबेमाथि हत्या, अपहरण र फिरौती उठाउने घटनामा संलग्न भएका ६० वटाभन्दा बढी अभियोगहरू रहेको बीबीसीले जनाएको छ ।
आठ प्रहरीको हत्या पछि उनका सहयोगीहरु पनि छुट्टाछुट्टै कारबाहीमा मारिएका छन् भने प्रहरीले उनको घर र गाडीहरुमाथि डोजर चलाएर नष्ट गरिदिएको छ ।
