जयपुर । मूल प्रवाह अखिल भारत नेपाली एकता समाज जयपुर उत्तर नगर समितिले देउसी भैलो कार्यक्रम समापन गरेको छ ।
नोभेम्बर २२, २०२५ का दिन सम्पन्न उक्त देउसीभैलो समापन समारोहमा मूल प्रवाह अखिल भारत नेपाली एकता समाजका केन्द्रीय सदस्य मोहन गिरीको प्रमुख आतिथ्यता एवं केन्द्रीय सदस्य बेलबहादुर रजालीको विशेष आतिथ्यता रहेको थियो ।
‘भारतमा रहने आम नेपाली मजदुरहरूलाई मूल प्रवाहले विश्व विद्यालयले जस्तै शिक्षित बनाउने काम गरेको छ ।’ गिरीले भन्नुभयो– ‘यो संगठनले भारतमा रहने आम नेपाली मजदुरहरूलाई सचेत-संगठित गर्दै स्वदेशमा न्याय र समानताको लागि चल्ने लडाईमा अग्रिम पंक्तिमा उभिने सिपाहीहरू निर्माण गर्ने कारखाना पनि हो ।’
त्यस्तै हालै भएको जेनजी पुस्ताको आन्दोलन मुलत कुशासन, भ्रष्टाचारको अन्त्यको लागि भएता पनि विभिन्न विदेशी शक्तिहरूको चलखेल र घुसपेठका कारण आन्दोलन गलत दिशामा पुगेको वेलबहादुर रजालीले बताउनु भयो ।
कार्यक्रममा पश्चिमोत्तर क्षेत्रीय समितिका सदस्य टंक थापा, केन्द्रीय प्रतिनिधि हुमा रजाली, पश्चिमोत्तर क्षेत्रीय उपाध्यक्ष ओम थापा, पश्चिमोत्तर महिला क्षेत्रीय विभागबाट कल्पना थापा, लक्ष्मी केसी, पश्चिमोत्तर सांस्कृतिक विभागका सदस्य बाबुराम थापा, अखिल भारतीय गोर्खा परिषद्का अर्जुन सोनी, राजस्थान नेपाल पेन्सनर्स समितिका रमेश केसीले पनि अतिथि आसन ग्रहण गर्नुभएको थियो ।
कार्यक्रमको अवसरमा महिलाहरूको म्युजिकल चेयर प्रतियोगिता पनि सम्पन्न भएको थियो । म्युजिकल चेयर प्रतियोगितामा विजय हुने विजेता तथा कलाकारहरूलाई पुरस्कृत गरिएको थियो ।
कार्यक्रम डम्बर केसीको अध्यक्षता तथा नारायण ज्ञवालीको सञ्चालनबाट सुरु भएको थियो । कार्यक्रममा सहभागिहरूलाई वासुदेव नेपालीले स्वागत गर्नुभएको थियो ।
स–साना कलाकारहरूले गीत र नृत्य प्रस्तुत गरेका थिए ।
