विरेन्द्रनगर (सुर्खेत) । राष्ट्रिय जनमोर्चा जिल्ला समिति सुर्खेतको आयोजनामा जेनजी आन्दोलन र वर्तमान राजनैतिक परिस्थिति बारे लेकबेशी क्षेत्र अन्तर्गतको दुईदिने राजनैतिक प्रशिक्षण कार्यक्रम लेकबेसीमा सम्पन्न भएको छ ।
कार्यक्रम राष्ट्रिय जनमोर्चा जिल्ला समिति सुर्खेतका उपाध्यक्ष भुपेन्द्र नेपालीको अध्यक्षतामा सम्पन्न भएको थियो ।
कार्यक्रममा राष्ट्रिय जनमोर्चाका केन्द्रीय उपाध्यक्ष जनकराज शर्माको प्रमुख अतिथ्यता रहेको थियो । त्यस्तै रक्तिम सांस्कृतिक अभियानका केन्द्रीय अध्यक्ष गिरीप्रसाद बुढा, राष्ट्रिय जनमोर्चा कर्णाली प्रदेश समितिका अध्यक्ष पुर्णबहादुर शाही, ने.क.पा.(मसाल) सुर्खेतका प्रबक्ता मोहन थापा, राष्ट्रिय जनमोर्चा सुर्खेतका जिल्ला सदस्य पार्वती ठाडा, अखिल नेपाल किसान संघका केन्द्रीय वैकल्पिक सदस्य प्रेम ठाडा, राष्ट्रिय जनमोर्चा प्रदेश सदस्य शेर बहादुर परियार, प्रदेश सदस्य भिमबहादुर फौंजा लगायतले अतिथि आसनग्रहण गर्नुभएको थियो ।
यस कार्यक्रमको पहिलो दिन कार्तिक २८ गते पार्टीका नेता कार्यकर्ता तथा शुभचिन्तकहरूको बिचमा राष्ट्रिय जनमोर्चा कर्णाली प्रदेशका अध्यक्ष पुर्णबहादुर शाहीले ने.क.पा.मसालको केन्द्रीय समितिको बैठकद्वारा पारित राजनैतिक दस्तावेज पढेर सामुहिक अध्ययन गराउनु भएको थियो ।
अध्ययन पश्चात् उक्त राजनीतिक दस्तावेजमा उठेका विषय केन्द्रीत प्रश्नहरूको जवाफ दिँदै राष्ट्रिय जनमोर्चाका केन्द्रीय उपाध्यक्ष जनकराज शर्माले समसामयिक राजनीतिक विषयबारे थप प्रकाश पार्नु भएको थियो ।
प्रशिक्षण कार्यक्रमको दोस्रो दिन नयाँ पुस्ताहरूको थप सहभागितामा प्रशिक्षणलाई निरन्तरता दिईएको थियो । सहभागी प्रशिक्षार्थीहरूलाई रक्तिम सांस्कृतिक अभियानका केन्द्रीय अध्यक्ष गिरीप्रसाद बुढाले दृष्टिकोण सम्बन्धि प्रशिक्षण दिनुभएको थियो ।
राजमो कर्णाली प्रदेशका अध्यक्ष पुर्णबहादुर शाहीले जेनजी आन्दोलनको सम्बन्धमा प्रशिक्षण दिनुभएको थियो । यसै गरी कार्यक्रमका जनकराज शर्माले जेनजी आन्दोलन र तात्कालिक राजनीतिक परिस्थिति बारे प्रशिक्षण दिनुभएको थियो । दुईदिनसम्म सञ्चालित यो कार्यक्रमको सञ्चालन राष्ट्रिय जनमोर्चा जिल्ला सदस्य जितबहादुर घर्तीले गर्नुभएको थियो ।
