काठमाडौँ । गत भदौ २३ र २४ गतेको जेनजी प्रदर्शनसँँग सम्बन्धित घटनामा हालसम्म देशभरिबाट एक सय ४१ ओटा मुद्दा दर्ता भएका छन् भने तीन सय ७५ जना पक्राउ परेका छन् ।
गृहमन्त्रालयका सहसचिव एवम् प्रवक्ता आनन्द काफ्लेले २०८२ कात्तिक १८ गते मङ्गलबार सो जानकारी उपलब्ध गराउनुभएको हो ।
नेपाल प्रहरीले कात्तिक १७ गतेसम्म गरेको अनुसन्धान र कारबाहीमा उक्त सङ्ख्यामा मुद्दा दर्ता र अभियुक्त पक्राउ परेका छन् ।
तथ्याङ्कअनुसार सबैभन्दा बढी काठमाडौँ उपत्यकामा ९६ ओटा मुद्दा दर्ता भएका छन् भने दुई सय १८ जनालाई पक्राउ गरिएको छ । यो सङख्या कुल पक्राउ सङ्ख्याको आधाभन्दा बढी हो ।
त्यस्तै बागमती प्रदेशमा ११ मुद्दामा ३३ जना, लुम्बिनी प्रदेशमा ११ मुद्दामा २९ जना, गण्डकी प्रदेशमा सात मुद्दामा ३२ जना, मधेस प्रदेशमा छ मुद्दामा २१ जना, कोशी प्रदेशमा चार मुद्दामा ३० जना पक्राउ परेका छन् ।
सबैभन्दा कम मुद्दा कर्णाली र सुदूरपश्चिम प्रदेशमा तीन/तीनओटा दर्ता भएका छन्, जहाँ क्रमश: चार र आठ जनालाई पक्राउ गरिएको छ ।
प्रवक्ता काफ्लेका अनुसार पक्राउ परेकामाथि आपराधिक उपद्रव, कर्तव्य ज्यान, चोरी, अभद्र व्यवहार तथा हातहतियार खरखजनाजस्ता गम्भीर शीर्षकमा मुद्दा चलाइएको छ । घटनामा संलग्न अन्य व्यक्तिको पनि खोजी तथा अनुसन्धान कार्य जारी रहेको मन्त्रालयले जनाएको छ ।
