काठमाडौँ । बङ्गालको खाडीमा विकसित मनसुनी प्रणालीको असरले असोज २० गतेसम्म ४० जिल्लामा बाढीको उच्च जोखिम देखा परेको छ ।
यस अवधिमा कुनै कुनै ठाउँमा भारीदेखि अतिभारी वर्षाको समेत सम्भावना रहेकाले उच्च सतर्कता अपनाउन मौसमविदले सुझाव दिएका छन् ।
जल तथा मौसम विज्ञान विभागका अनुसार अविरल वर्षाका कारण ४० जिल्लामा बाढीको उच्च जोखिम छ । उच्च जोखिममा काठमाडौँ उपत्यकासमेत परेको छ ।
अहिले वर्षाको दर विस्तारै बढ्दै गएको छ र यो क्रम राति अझै बढ्न सक्ने सम्भावना छ । त्यसैले काठमाडौँका नदीको बहाव बढ्दै गएर सतर्कताको तह नजिक पुगेको छ ।
बाढीको सतह अझै बढ्ने सम्भावना भएकाले आज बेलुका र भोलिसम्मका लागि विशेष सतर्कता जरुरी रहेको विभागले जनाएको छ ।
‘त्यस हिसाबले यी क्षेत्रमा सतर्कता अपनाउनु पर्नेछ’ विभागको बाढी पूर्वानुमान शाखा प्रमुख विनोद पराजुलीले भने– ‘आज बेलुका र भोलि विशेष सतर्कता जरुरी छ ।’
डुबान भइरहने र बाढी आउने क्षेत्रमा विशेष गरी नदी किनारमा यात्रा नगर्न मौसमविदले सुझाव दिएका छन् ।
उच्च जोखिमयुक्त जिल्ला
विभागका अनुसार अहिले बागमती प्रदेशका चितवन, मकवानपुर, सिन्धुलीलगायतका जिल्लामा वर्षा मध्यमबाट भारीतर्फ उन्मुख छ । त्यसैगरी मधेश प्रदेशका बारा, पर्सा, रौतहट, सर्लाही, महोत्तरीमा पनि वर्षा भारीतर्फ उन्मुख छ ।
‘अहिलेसम्म वर्षाले खतराको तह पार गरिसकेको त छैन तर त्यसको नजिक छ’ पराजुलीले भने ।
विभागका अनुसार सुनसरी, उदयपुर, सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, सिन्धुली, दोलखा, रामेछाप, सिन्धुपाल्चोक, काभ्रे लगायतका जिल्लामा बाढीको अति उच्च जोखिम छ ।
त्यसैगरी, काठमाडौँ, ललितपुर, भक्तपुर, मकवानपुर, चितवन र आसपासका जिल्लालाई पनि अति उच्च जोखिमको सूचीमा राखिएको छ ।
साथै इलाम, झापा, मोरङ, धनकुटा, तेह्रथुम, पाँचथर, भोजपुर, खोटाङ, ओखलढुङ्गा, सोलुखुम्बु, सङ्खुवासभा, ताप्लेजुङ, रसुवा, नुवाकोट, धादिङ पनि बाढीको उच्च जोखिममा छन् ।
यसैगरी गोरखा, नवलपरासी पूर्व, नवलपरासी पश्चिम, रुपन्देही, कपिलवस्तु र आसपासका जिल्ला उच्च जोखिममा छन् ।
कास्की, लमजुङ, पर्वत, स्याङ्जा, तनहुँ, गुल्मी, पाल्पा, अर्घाखाँची, प्युठान, दाङ, बाँके, बर्दियामा मध्यम जोखिमको सूचीमा राखिएको छ ।
