काठमाडौँ । वर्षाका कारण काठमाडौँतर्फ आइरहेका र काठमाडौँबाट बाहिर जान निस्किएका सवारीसाधन चितवन, तनहुँ र धादिङमा रोकिएका छन् ।

२०८२ असोज १७ गते रातिदेखि भएको वर्षाले गर्दा यातायातको अवस्था असहज बनेको हो ।

वर्षाले पृथ्वी राजमार्गको कोत्रे–मुग्लिन–नागढुङ्गा र नारायणगढ–मुग्लिन सडकमा अवरोध छ । मुख्य गरी यो राजमार्गमा पर्ने नारायणगढ–मुग्लिन सडक खण्डको तुइनखोला र मुग्लिन–नागढुङ्गा अन्तर्गतको धादिङतर्फ पर्ने जवाङखोलामा पहिरोको जोखिम छ । धादिङ प्रहरीले रातिदेखि नै जवाङखोलामा पहिरो जाँदा बाटो रोकिएको छ ।

राती २ बजेदेखि पहिरो खसेर पूर्ण रूपमा रोकिएको सडक खुलाउँदै जोखिममा रहेका सवारी पास गराउँदै गरिएपनि पटक पटक पहिरो खसिरहेको कारणले बाटो पूर्ण रूपमा बन्द भएको प्रहरीले बताएको छ ।

जोखिमको अवस्थामा रहेका सवारी साधनलाई १७ ओटा होल्डिङ सेन्टर पहिचान गरी ट्रक, बस तथा साना गाडीलाई छुट्टाछुट्टै रोकिएको छ । अनिवार्य कटाउनुपर्ने अवस्थामा रहेका सवारी साधनलाई जम्मा गरेर बाटोको अवस्था हेरि प्रहरीले नै सुरक्षा दिँदै पहिरो कटाउने गरिएको छ ।
प्रहरीले सकेसम्म नयाँ सवारीलाई बाटोमा नआउन वा घर फिर्ता जान सक्ने यात्रुलाई फर्किन अनुरोध गरेका छ ।

यता मुग्लिङ–नागढुङ्गा सडकको आयोजनाअन्तर्गत जवाङखोलाको पहिरो हटाइसकिए पनि पहिरो कति बेला खस्न सक्छ भन्ने यकिन भने नभएकोले सुरक्षाकर्मीको कुरालाई मानेर मात्रै यात्रामा निस्किन प्रहरीले अनुरोध गरे ।

कुनै अवरोध नभएपनि तनहुँतर्फको ट्राफिक प्रहरीले काठमाडौँ तथा चितवनतर्फको सडकमा भएको जोखिमको कारण सवारी साधन रोकेको जनाएको छ । तनहुँ ट्राफिक प्रहरीले सडकको जोखिमबारे जानकारी गराउँदा गराउँदै पनि सवारी चाप बढिरहेको बताएको छ ।

उनले राजमार्गको सुरक्षालाई मध्यनजर गरी धादिङ र चितवनतर्फ समन्वय गरेर डुम्रे, आँबुखैरहनीमा गाडी होल्ड गरेको बताए । बिहान ७ बजेदेखि होल्ड गरेर सडकको अवस्था बुझेर मात्रै छोडिएको उनको भनाइ छ ।

चितवनतर्फ भने तत्कालले ठुलो पहिरोको जोखिम तुइनखोलामा देखिए पनि नारायणगढ–मुग्लिङको ३६ किलोमिटर क्षेत्रको धेरै स्थानमा ढुङ्गा खसिरहेको जोखिम स्थल भएकाले बिहान ६ बजेदेखि नै यात्रु रोकेको चितवन प्रहरीले जनाएको छ ।

चितवन प्रहरीका अनुसार चितवनको आँपटारीमा सुरक्षाकर्मी खटाएर यात्रुलाई रोकाइएको छ । राजमार्गको जोखिम बढ्दो भएको कारण ठुलो पानी पर्ने समयअवधिभर राजमार्ग खाली राख्ने पक्षमा प्रहरी रहेको छ ।

प्रहरीले डिभिजन सडक कार्यालयले पहिरो खसेको र हटाएका प्राविधिक जानकारी मात्रै दिएको कारण त्यही सूचनालाई आधार मानेर यात्रा नगर्न समेत अनुरोध गरेको छ ।