धुलिखेल । भारी वर्षा र बाढीपहिरोको उच्च जोखिमलाई मध्यनजर गर्दै विपी राजमार्गमा आगामी छ दिननसम्म रात्रिकालीन सवारी आवागमनमा रोक लगाइएको छ ।
२०८२ असोज १६ गते बिहीबिार जिल्ला प्रशासन कार्यालय काभ्रेपलाञ्चोकले सूचना जारी गर्दै राजमार्गको एक खण्डमा रोक लगाएको हो ।
सूचनाअनुसार २०८२ असोज १६ गते बिहीबारदेखि असोज २१ गते मङ्गलबारसम्म साँझ ५ बजेदेखि बिहान ५ बजेसम्म उक्त सडक खण्डमा एम्बुलेन्स र अत्यावश्यक सेवाका सवारी साधनबाहेक सबै प्रकारका सार्वजनिक तथा निजी यात्रुवाहक सवारी साधनको आवागमनमा रोक लगाइएको छ । यो प्रतिबन्ध बिपी राजमार्गको काभ्रे भञ्ज्याङ–भकुण्डेवेशी–सिन्धुली सडक खण्डमा लागु हुनेछ ।
बाढीपहिरोको उच्च जोखिमलाई ध्यानमा राखी उच्च सतर्कता अपनाउन भन्दै प्रमुख जिल्ला अधिकारी उमेशकुमार ढकालले सबै जिल्लावासी र सम्बन्धित निकायलाई पूर्वतयारीमा जुट्न अनुरोध गरेका छन् ।
राष्ट्रिय बिपत् जोखिम न्यूनीकरण तथा व्यवस्थापन प्राधिकरणले प्रकाशन गरेको सूचनाअनुसार असोज १७ गतेदेखि २० गतेसम्म काभ्रेमा भारी वर्षा हुने सम्भावना देखाइएको छ । यसैका आधारमा प्रशासनले उच्च सतर्कता अपनाउन आग्रह गरेको हो ।
प्रशासनले जारी गरेको सूचनामा उल्लेखित अवधिमा अत्यन्त जरुरी नभईकन बाहिर नजान, विशेषगरी टाढा र रातको समयमा यात्रा नगर्न आग्रह गरिएको छ ।
यातायात व्यवस्थापनमा थप कडाइ गर्दै प्रशासनले रोशीखोला र स्थानीय खहरेखोलामा बाढी आएको र अन्य समयमा पनि स्थानीय प्रहरी र ट्राफिक प्रहरीले जुनसुकै स्थानमा सवारीसाधन रोक्न सक्ने जनाएको छ ।
जिप्रका काभ्रेले पहिरोको जोखिममा रहेका तथा नदी किनारका बस्तीमा उच्च सतर्कता अपनाउन पनि आग्रह गरेको छ ।
