काठमाडौँ । काभ्रेपलाञ्चोकको पनौती नगरपालिका–१२ गागलमा श्रीमती मनिषा घ्यावा तामाङको हत्या गरेर सन्तबहादुर तामाङ नख्खु कारागार फर्किएका छन्।
असोज २ गते राति श्रीमानले पर–पुरुष सँग लागेको शंकाका कारण श्रीमतीलाई कुटपिट गरी हत्या गरेको प्रारम्भिक अनुसन्धानले देखाएको छ ।
हत्या पश्चात शव खाल्डोमा पुरेर कारागारमा उपस्थित भएका थिए र उनीमाथि कर्तव्य ज्यान मुद्दामा अनुसन्धान भइरहेको छ।
उनी कारागार फर्किएको खुलेपछि काभ्रे प्रहरीको टोली समेत नख्खु पुगेको छ। उनीमाथि अब कर्तव्य ज्यान मुद्दामा पनि अनुसन्धान गरिनेछ।
इलाका प्रहरी कार्यालय बनेपाबाट खटी गएको प्रहरी अधिकृतको टोली सहित फोरेन्सिक मेडिसिन बिभागको विशेषज्ञ डाक्टरको टोलीले उक्त लाशको उत्खनन गरी प्रारम्भिक अनुसन्धान कार्य पश्चात पोष्टमार्टमको लागी मृतक लाशलाई फोरेन्सिक मेडिसिन विभाग धुलिखेल काभ्रेपलाञ्चोकमा ल्याई राखेको प्रहरीले जनाएको छ ।
गएको भदौ २४ गते ‘जेनजी’को प्रदर्शनका क्रममा कारागार तोडफोड र आगजनी गरिँदा तामाङ जेलबाट भागेका थिए ।
तामाङका १२ वर्षीय एक छोरा र तीन वर्षीया छोरी छन् । जबरजस्ती करणी कसुरमा उनको कैद सजाय पूरा हुन एक महिना मात्र बाँकी रहेको कारागार स्रोतले जनाएको छ ।
