विराटनगर । कोशी प्रदेशका मुख्यमन्त्री हिक्मतकुमार कार्कीले जेनजी आन्दोलनका क्रममा भएको तोडफोड र आगजनीबाट क्षतिग्रस्त मुख्यमन्त्री तथा मन्त्रिपरिषद्को कार्यालयको आज अनुगमन तथा निरीक्षण गर्नुभएको छ ।

अनुगमनपछि प्रदेश सरकारका सचिव तथा उच्च पदस्थ कर्मचारीहरूसँग छलफल गर्दै मुख्यमन्त्री कार्कीले प्रदेशका कार्यालयहरूमा ठूलो क्षति पुगेको बताउनुभयो । उहाँले कर्मचारीहरूलाई त्रासमुक्त भएर काममा फर्कन र दसैँअघि नै कार्यालय सञ्चालनको सम्पूर्ण व्यवस्थापन मिलाउन निर्देशन दिनुभयो ।

मुख्यमन्त्री कार्कीले घटनालाई नेपालको इतिहासमै सबैभन्दा ठूलो भौतिक क्षतिको घटना भएको स्मरण गर्दै आजैदेखि प्रदेश सरकार सञ्चालनमा आएको घोषणा गर्नुभयो । उहाँले असोज २ गते मन्त्रिपरिषद्को बैठक बसेर थप निर्णयहरू गर्ने जानकारी दिँदै घटनाका विषयमा छानबिन गरी दोषी माथि कारबाहीको माग गर्नुभयो ।

छलफलमा कोशी प्रदेशकी प्रमुखसचिव चन्द्रकला पौडेलले प्रदेशको वस्तुस्थितिको बारेमा जानकारी गराउनुभएको थियो । आन्दोलनका क्रममा कोशी प्रदेशमा भवन र सवारीसाधनतर्फ राज्यको सम्पत्तिमा ठूलो नोक्सानी भएको पाइएको हो ।

यस आन्दोलनबाट कोशी प्रदेश सरकार मातहत रहेका प्रदेशभरका ४२ वटा भवन क्षतिग्रस्त भएका छन् । जसमध्ये १८ वटा भवन पूर्ण क्षतिग्रस्त छन्भने २४ वटा भवनमा तोडफोड भई आंशिक क्षति पुगेको छ भनिएको छ ।

आन्दोलनकारीले प्रदेश सरकारको २३७ वटा सवारीसाधनमा क्षति क्षति पु¥याएको पाइएको छ । जसमा ७५ वटा चारपाङ्ग्रे सवारीसाधनमा क्षति पुगेको छ । त्यसमध्ये ६४ वटा चारपाङ्ग्रे सवारीसाधन पूर्णरूपमा क्षतिग्रस्त भएका छन्भने ११ वटामा आंशिक क्षति भएको छ ।

यसैगरी १६१ वटा मोटरसाइकलमा क्षति पुगेको छ । तीमध्ये १४४ वटा मोटरसाइकल पूर्ण रूपमा क्षतिग्रस्त भएका छन् भने १७ वटामा आंशिक क्षति पुगेको मुख्यमन्त्री कार्कीका प्रेस सल्लाहकार विक्रम लुइँटेलले जानकारी दिनुभयो ।

क्षतिको विवरण

जेनजी आन्दोलनको क्रममा मोरङमा १५५ वटा संचरना ध्वस्त भएको जिल्ला प्रशासन कार्यालय मोरङले जनाको छ । कार्यालयबाट प्राप्त जानकारीअनुसार सङ्घीय कार्यालयतर्फ २१ वटा, प्रदेश कार्यालयतर्फ १४ वटा, स्थानीय (पालिका भवन) १० वटा, वडा कार्यालय ५८ वटा, निजी घर १५ वटा, संस्थान (कर्मचारी सञ्चय कोष) एक वटा, व्यापारिक भवन तीन वटा, अन्य सङ्घसंस्था चार वटा, राजनीतिक पार्टी कार्यालय आठ वटा आन्दोलनको क्रममा ध्वस्त भएको सहायक प्रमुख जिल्ला अधिकारी सरोज कोइरालाले जानकारी दिनुभयो ।

यस्तै, जनपथ प्रहरीका १७ वटा पोष्ट तथा कार्यालय र सशस्त्र प्रहरीका चार वटा पोष्टमा पनि क्षति भएको बताइएको छ ।