काठमाडौँ । नेकपा (मसाल) ले अखिल नेपाल शिक्षक सङ्घका पूर्व केन्द्रीय उपाध्यक्ष महेन्द्र बस्नेतको निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८२ भदौ २९ गते आइतबार शोकवक्तव्य सार्वजनिक गर्दै शोक व्यक्त गरिएको हो ।
स्मृतिशेष बस्नेत मसालको पार्टी सदस्यसमेत भएको तथा उहाँको निधनबाट पार्टीको आन्दोलनमा गम्भीर क्षति पुगेको वक्तव्यमा उल्लेख छ ।
सन्तप्त परिवारप्रति समवेदना व्यक्त गरिएको शोकवक्तव्यको पूर्ण पाठ यस्तो छ :
“कञ्चनपुर जिल्ला पुनर्वास नगरपालिका–६ निवास कामरेड महेन्द्र बस्नेतको २०८२ साउन ३१ गते मृत्यु भएको छ । हामीले उहाँको मृत्युप्रति गहिरो दुःख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
कामरेड बस्नेत हाम्रो पार्टीको सदस्य हुनुहुन्थ्यो । उहाँ हाम्रो पार्टीको शिक्षक मोर्चाको केन्द्रीय उपाध्यक्षको समेत जिम्मेवारी सम्हालिसकेको एक शिक्षाप्रेमी र शैक्षिक व्यक्तित्व हुनुहुन्थ्यो । उहाँले हाम्रो पार्टीको विभिन्नस्तरका समितिमा रहेर आफ्नो जिम्मेवारी पूरा गर्नुभएको थियो । उहाँ शैक्षिक व्यक्तित्वका साथै इमान्दार, निष्ठाबद्ध र अनुशासित सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति पुगेको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
