काठमाडौँ । कुवेत नेपाली एकता समाजले संविधानलाई आधार बनाएर निकासको बाटो खोज्न जोड दिएको छ ।
महासचिव खुम रायमाझीको हस्ताक्षरमा २०८२ भदौ २६ गते राती जारी प्रेसवक्तव्यमा यो धारणा व्यक्त गरिएको हो ।
२०६२–६३ सालको जनआन्दोलनका उपलब्धिमाथि टेकेर वर्तमान राजनीतिक सङ्कट निकास खोज्नुपर्ने एकता समाजको मत छ ।
यस्तो छ, प्रेसवक्तव्यको पूर्ण पाठ :
“अहिले नेपालको वर्तमान राजनितिक अवस्था गम्भीर बन्दै गइरहेकोप्रति हाम्रो सङ्गठन कुवेत नेपाली एकता समाजको ध्यानाकर्षण भएको छ ।
सर्वप्रथम त गत २०८२ भदौ २३ र २४ गतेको अकल्पनीय घटनापछि देशमा उत्पन्न अप्रिय परिस्थितिबारे गम्भीर चिन्ता व्यक्त गर्न चाहान्छौँ । जेनजी आन्दोलनको क्रममा मृत्यु भएका मृतकप्रति हार्दिक श्रद्धाञ्जली तथा घाइतेको शीघ्रस्वास्थ्य लाभको कामना गर्दछौँ ।
अहिले देखिएको विषम राजनीतिक परिस्थितिलाई समाधान कसरी खोज्ने ? यो गम्भीर प्रश्न उब्जिएको छ । नेपालको संविधान २०७२ को संविधानको आधारमा नेपालका राजनितिक दलको सर्वसहमतिमा जेनजीले उठाएका मागलाई सम्बोधन गर्दै निकासको बाटो खोज्नुपर्ने आवश्यकतामा हामी जोड दिन चाहन्छौँ ।
२०६२–६३ सालको जनआन्दोलनमा नेपाली जनताको बलिदानीपछि प्राप्त लोकतन्त्र, गणतन्त्र, धर्मनिरपेक्षता, मौलिक अधिकार, समावेशिता र विकेन्द्रीयताको स्थापना गरेको थियो । अहिलेको अवस्थामा पनि लोकतन्त्र, गणतन्त्र र धर्मनिरपेक्षता त्यत्तिकै आवश्यक छ भन्ने हाम्रो ठहर रहेको छ ।
२०७२ सालको संविधान जननिर्वाचित संविधानसभाले बनाएका कारण अहिले पनि त्यो जनमतको विरुद्ध जानुहुँदैन भन्ने हाम्रो सङ्गठनको मान्यता रहेको छ । अहिले सङ्कटको अवस्थामा साम्राज्यवादी शक्तिले विभिन्न चलखेल भइरहेको र देशमा उथलपुथल बनाउने षड्यन्त्र भइरहेको पनि हामीले महसुस गरिरहेका छौँ । तसर्थ हामीले देशमा कायम गरेको शान्तिसुव्यवस्था र लोकतन्त्रको रक्षाका लागि सजग हुन सम्पूर्ण नेपाली जनतालाई अपिल गर्दछौँ ।”
