काठमाडौँ । प्रगतिशील पत्रकार सङ्घले निर्भयपूर्ण वातावरणमा समाचार कभरेज गर्न व्यवस्था मिलाउन माग गरेको छ ।
अध्यक्ष श्यामलाल पोखरेलको हस्ताक्षरमा २०८२ भदौ २६ गते बिहीबार प्रेसवक्तव्य जारी गर्दै प्रगतिशीलले सो माग गरेको हो ।
प्रेस स्वतन्त्रता नागरिक अधिकारकै एउटा स्वरूप भएको दाबी गर्दै विज्ञप्तिमा पत्रकारको सुरक्षा, घाइते पत्रकारको निःशुल्क उपचार र बिमाको व्यवस्था कार्यान्वयन गर्न माग गरिएको छ ।
वर्तमान राजनीतिक निकासको सन्दर्भमा प्रगतिशीलले २०६२–६३ सालको जनआन्दोलनका उपलब्धि र २०७२ सालको संविधानको दायराभित्र खोजिनुपर्ने माग गरिएको छ ।
वक्तव्यमा मृतकप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना र घाइतेको शीघ्र स्वास्थ्यलाभको कामना व्यक्त गरिएको छ ।
यस्तो छ, प्रेसवक्तव्यको पूर्ण पाठ :
“महँगी, भ्रष्टाचार, कुशासन, बेथिति, राष्ट्रघातलगायतका समस्याप्रति असन्तोषको प्रतिक्रियास्वरूप २०८२ भदौ २३ र २४ को घटनाले गर्दा देश एकपटक फेरि विषम परिस्थितिमा उभिएको छ । यसले गर्दा २०६२–६३ सालको जनआन्दोलनको उपलब्धि र संविधानको रक्षाका सामु गम्भीर चुनौती आइपरेका छन् ।
प्रगतिशील पत्रकार सङ्घ वर्तमान राजनीतिक समस्याको निकास २०७२ सालको संविधानको दायरामा खोजिनुपर्दछ भन्ने धारणा व्यक्त गर्दछ । लोकतन्त्र, गणतन्त्र, धर्मनिरपेक्षता, मौलिक अधिकार, प्रेस स्वतन्त्रताजस्ता विषयको रक्षा गर्दै आगामी राजनीतिक कोर्स अगाडि बढ्नुपर्दछ भन्ने हाम्रो सङ्गठनको मत छ ।
जस्तोसुकै विषम परिस्थितिमा पनि प्रेस स्वतन्त्रताको रक्षा हुनुपर्दछ किनकि प्रेस स्वतन्त्रता नागरिक स्वतन्त्रताकै एउटा स्वरूप हो भन्ने हाम्रो मान्यता छ । त्यसैले अहिलेको विषय परिस्थितिमा समेत सबै विधाका पत्रकारलाई निर्भयपूर्ण वातावरणमा समाचार कभरेज गर्ने व्यवस्था मिलाइयोस् । त्यस क्रममा पत्रकार र पत्रकारिताको सुरक्षाको प्रबन्ध मिलाइयोस् साथै घाइते पत्रकारको निःशुल्क उपचार तथा बिमाको व्यवस्था कार्यान्वयन गरियोस् भन्ने माग गर्दछौँ ।
अन्तमा भदौ २३–२४ गतेको घटनामा ज्यान गुमाउने सम्पूर्ण मृतकप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना तथा घाइतेको शीघ्र स्वास्थ्यलाभको कामनासँगै उचित स्वास्थ्योपचारमा ध्यान दिन आग्रह गर्दछौँ ।”
