काठमाडौं । ६ जना युवाको हत्या हुनेगरी रुकुम पश्चिमको चौरजहारीमा भएको जातीय हिंसाको घटना छानबिन गर्न गठित संसदीय टोली घटनास्थल पुगेको छ । घटनाको छानबिन गरी प्रतिवेदन पेस गर्नका लागि गठन गरिएको संसदीय विशेष समितिले घटनास्थलमै पुगेर छानविन थालेको हो ।

घटना भएको स्थान चौरजहारी नगरपालिका–८ सोती गाउँमा बुधबार बिहान टोली पुगेको समितिका सदस्य एवं राष्ट्रिय जनमोर्चाका सांसद दुर्गा पौडेलले जानकारी दिनुभयो ।

जेठ ३२ गतेदेखि समितिले छानबिन थालेको हो । यस अघि जाजरकोटको भेरी नगरपालिका–४ मा पुगेर समितिले पीडित परिवारसँग भेटघाट गरेको सांसद पौडेलले युगदर्शनलाई जानकारी दिनुभयो ।

जेठ १० गते जाजरकोट भेरी नगरपालिका ४ का नवराज विकसहित टिकाराम सुनार, गणेश बुढामगर, लोकेन्द्र सुनार, सञ्जु विक र गोविन्द शाहीलाई हत्या गरी भेरी नदीमा फालिएको अवस्थामा शव फेला परेको थियो ।

सो घटनाको छानबिन गर्न सांसद देवेन्द्र पौडेलको संयोजकत्वमा नौ सादस्यीय छानबिन समिति गठन गरिएको थियो । समितिमा सांसद दुर्गा पौडेलसहित मीनबहादुर विश्वकर्मा, प्रकाश रसाइली, एकवाल मियाँ, पार्वती कुमारी बिसुन्के, बिमला विक, महेश्वरजंग गहतराज र रामसहाय प्रसाद यादव सदस्य छन् ।

सरकारले गत जेठ २६ गते पौडेल नेतृत्वमा संसदीय विशेष समिति गठन गरेको थियो । सो टोलीमा रहेका संसद सचिवालयका सहसचिव सुरजकुमार दुरासहितका पाँच जना पनि सो घटनाको छानविनका लागि रुकुम पुगेका छन् ।

रुकुम पश्चिमको चौरजहारी नगरपालिका– ८ कि आफ्नी प्रेमिका सुष्मा मल्ल ठकुरीसँग बिहे गर्न भनी रुकुमको सोती पुगेका जाजरकोटका प्रेमी नवराज विकसहित १८ जनामध्ये ६ जनालाई त्यहाँका स्थानीयले लखेटेर हत्या गरेका थिए।

घटनालगत्तै गृह मन्त्रालयले सहसचिव जितेन्द्र बस्नेतको संयोजकत्वमा नेपाल प्रहरीका एसएसपी जनक भट्टराई, केन्द्रीय अनुसन्धान विभागका ओमबहादुर खड्का, मन्त्रालयका उपसचिव वशिष्ट कुमार घिमिरे र माधवप्रसाद ढकाल रहेको पाँच सदस्यीय छानविन टोली गठन गरेको थियो ।

रुकुम घटनाः वडाअध्यक्षकै योजनामा, पीडित परिवारलाई १० लाख दिने तयारी

मन्त्रालयको सो टोलीले आफ्नो प्रतिवेदन बुझाइसकेको छ । प्रतिवेदनमा नवराज विकसहित ६ जनालाई ४ किलोमिटरसम्म लखेटेर हत्या गरी भेरी नदीमा फालिएको उल्लेख छ । घटनाका योजनाकार चौरजहारी नगरपालिका–८, का वडाध्यक्ष डम्बर बहादुर मल्ल रहेको समेत प्रतिवेदनमा उल्लेख छ।

गृह मन्त्रालयको छानविन समितिले प्रतिवेदन बुझाएलगत्तै संसदीय विशेष समिति रुकुम गएको हो।