खिमराज चालिसे, चन्डिगढ (भारत) ।
भारतको पन्जाब राज्यको रोपडबाट हराएका शेरबहादुर बस्नेत मूल प्रवाह अखिल भारत नेपाली एकता समाज रोपडकै पहलकदमीमा भेटिएका छन् ।
अगस्त २६, २०२५ का दिन अलपत्र अवस्थामा फेला परेका शेरबहादुरलाई मूल प्रवाहले अगस्त ३१ का निजका परिवारलाई हस्तान्तरण गरेको हो ।
शेरबहादुरकै भतिजा योगेश बस्नेतको जिम्मामा उनलाई आज सेप्टेम्बर १ का दिन नेपाल पठाउने व्यवस्था मिलाइएको मूल प्रवाह रोपडले जानकारी दिएको छ ।
मानसिक सन्तुलन पूर्णतः ठिक नभएका शेरबहादुर जाजरकोट जिल्ला, जुनेचादे गाउँपालिका वडा नम्बर ५ का स्थायी बासिन्दा हुन् । उनी रोजगारीका लागि भारत पसेपछि दिमागी सन्तुलन गुमाएर गत तीन वर्षदेखि सम्पर्कविहीन अवस्थामा रहेको परिवारले जानकारी दियो ।
उनलाई पन्जाबको रोपडमा मूल प्रवाहका कार्यकर्ताले बेवारिसे अवस्थामा फेला पारी सामाजिक सञ्जालमार्फत आफन्तको खोजीका लागि पहल गरेपछि निजका घरपरिवार सम्पर्कमा आएका थिए ।
