काठमाडौँ । राष्ट्रिय जनमोर्चाका केन्द्रीय सदस्य तथा दाङ जिल्ला अध्यक्ष गणेश आचार्यले दाङको एक नम्बर सक्रिय राजनीतिक शक्तिमा राजमो रहेको दाबी गर्नुभएको छ ।

युगदर्शन मिडियालाई २०८२ साउन २६ गते भिडियो अन्तर्वार्ता दिँदै उहाँले यस्तो दाबी गर्नुभएको हो ।

‘चुनावी सिटको हिसाबले हामी त्यति बलिया छैनौँ’ उहाँले भन्नुभयो– ॅतर राजनीतिक सक्रियता र कार्यकर्ता परिचालनको हिसाबले दाङमा राष्ट्रिय जनमोर्चा एक नम्बरमा छ ।’

यो तथ्यलाई दाङको प्रशासनले पनि स्वीकार गरेको उहाँको भनाइ थियो ।

प्रशासनलाई उद्धृत गर्दै उहाँले भन्नुभयो– ‘दाङका प्रशासनले भन्छ, संसदीय सिटको हिसाबले तपाईंहरू कति नम्बरमा पर्नुहुन्छ ? त्यो त हामीलाई थाहा छैन तर राजनीतिक सक्रियताको हिसाबले तपाईंहरू एक नम्बरमा हुनुहुन्छ ।’

अध्यक्ष आचार्यले दाङको स्थानीय तहमा नौ जना जनप्रतिनिधि अहिले पनि सक्रिय रहेको जानकारी दिनुभयो ।

‘दाङको दश स्थानीय तहमध्ये छओटा स्थानीय तहमा हाम्रो साम्रो सङ्गठन छ । बाँकी चारमध्ये तीनओटा स्थानीय तहमा सम्पर्क छ’ उहाँले युगदर्शनसित भन्नुभयो ।

सरकारको भूमिका कमजोर

अन्तर्वार्ताको क्रममा उहाँले दाङ सरकारको उपस्थिति अत्यन्तै कमजोर रहेको विश्लेषण अगाडि सार्नुभयो ।

‘दाङमा सत्तासिन काङ्ग्रेस, एमाले र माओवादीका सांसद छन् । सरकार उनीहरूकै बन्छ । लुम्बिनी प्रदेशका मुख्यमन्त्री बनिसकेका शङ्कर पोखरेल पनि दाङकै हुन्’ उहाँले भन्नुभयो– ‘तर जनतालाई डेलिभरी दिने गरी उनीहरूले कुनै काम गर्न सकिरहेका छैनन् ।’

दाङमा गतिलो एयरपोर्ट नभएको प्रसङ्ग अगाडि सार्दै उहाँले भन्नुभयो– ‘राजनीतिक दलबाट कुरा गर्दा दाङका सबै उपत्यकामा एयरपोर्ट बनाउने कुरा गरिन्छ तर एक स्थानमा पनि बन्दैन ।’

संसदीय राजनीतिक गर्नेहरूले चुनावी भाषण गर्ने क्रममा दाङलाई स्मार्टसिटी बनाउनेसमेत बताएको उहाँले स्मरण गर्नुभयो ।

सुन्दर दाङको परिकल्पना

सुन्दर दाङ बनाउने परिकल्पना गर्ने हो भने तपाईंका योजना के छन् भन्ने प्रश्नको उत्तरमा अध्यक्ष आचार्यले त्यहाँ धेरै सम्भावना भएको बताउनुभयो ।

‘दाङमा धेरै सम्भावना छन् । प्रथमतः दाङ सुन्दर नगरी हो । यहाँको जमिनका उर्वराशक्ति राम्रो छ । प्रशस्त पर्यटकीय सम्भावना छ । दाङलाई शैक्षिक हब बनाउन सकिन्छ’ यस्ता धेरै सम्भावना रहेको बताउँदै उहाँले सोअनुसार यहाँका जनप्रतिनिधि र सरकारले काम नगरेको गुनासो गर्नुभयो ।

दाङ एसियाकै दोस्रो महत्त्वपूर्ण उपत्यका भएको बताउँदै उहाँले यो सकारात्मक पक्षलाई पक्रिनुपर्नेमा जोड दिनुभयो ।

साहित्य र मिडियाको क्षेत्रमा समेत दाङको अवस्था राम्रो रहेको उहाँको भनाइ थियो ।

‘राप्ती साहित्य परिषद् दाङको सक्रिय साहित्यिक सङ्गठन हो । नयाँ युगबोध दाङका पत्रिकाकै पर्यायवाची बनेको छ’ आचार्यले भन्नुभयो ।

थारू समुदाय

अन्तर्वार्ताको क्रममा दाङ थारू समुदायको ऐतिहासिक भूमि रहेको पनि उहाँको भनाइ हो ।

‘दाङ थारू जातिको ऐतिहासिक समुदाय हो’ उहाँले भन्नुभयो– ‘सम्भवतः दाङबाटै पश्चिमतर्फ थारू जाति फैलिएको हुन सक्दछ ।’

थारू जातिको स्वशासनको सवालमा भने उहाँले अहिले सो स्थिति नरहेको बताउनुभयो । पहाडबाट बसाइँसराइ तराईतिर हुँदा मिश्रित बसोबासका कारण थारू जातिको प्रदेशस्तरीय स्वशासन सम्भव नभएको उहाँको भनाइ थियो ।

फेरि पनि थारू समुदायको उम्मेदवार नहुँदा चुनाव जित्नै नसकिने प्रकारको अवस्था भने त्यहाँ रहेको उहाँको बुझाइ थियो ।

गणतन्त्रको रक्षा मुख्य विषय

केन्द्रीय सदस्यसमेत रहनुभएका आचार्यले राष्ट्रिय राजनीतिमा गणतन्त्रको रक्षा अहिलेको मुख्य विषय भएको विश्लेषण अगाडि सार्नुभयो ।

गणतन्त्र, लोकतन्त्रसँगै राष्ट्रियताको रक्षा, धर्मनिरपेक्षताको रक्षा तथा भ्रष्टाचारको विरुद्धजस्ता विभिन्न विषयमा राजमो निरन्तर आन्दोलनमा रहेको उहाँको दाबी थियो ।

नेपालमा राजनीतिक दलमा अत्यन्तै दलीय सङ्कीर्णता रहेको बताउँदै उहाँले यही सङ्कीर्णताका कारण सहकार्यको अभ्यास कमजोर रहेको उहाँको भनाइ थियो ।

त्यस्तै, दलहरूको खराब चरित्रका कारण देशमा बेरोजगारी चरम रूपमा रहँदा युवाको विदेश पलायन बढ्दै गएको बताउनुभयो ।

देशको अन्यौलपूर्ण राजनीतिको बारेमा जनचेतना फैलाउनुपर्ने आवश्यकतामा उहाँले जोड दिनुभयो ।

(अन्तर्वार्ताको पूर्ण पाठका लागि युगदर्शनको युट्युब च्यानल https://www.youtube.com/watch?v=hKq3TKq6mHA वाच गर्न अनुरोध गर्दछौँ)