भक्तपुर । पूर्वराष्ट्रपति विद्या भण्डारीलाई नेकपा एमालेभित्रै राजनीतिक सक्रियता रोक्ने प्रयासप्रति पार्टीकै स्थायी कमिटी सदस्य कर्णबहादुर थापाले एमाले केन्द्रीय समितिको बैठकदेखि नै आपत्ति जनाउँदै आएका छन् । थापाले उक्त पार्टीमा उठाउँदै आएको आवाजका वाबजुद एमालेमा कर्ण ‘प्रिय’ कम लाग्न थालेका छन् ।
सुदुर पश्चिमका एमाले इन्चार्ज समेत रहेका थापाले एमाले केन्द्रीय समितिको गत बैठकमा विद्यादेवी भण्डारीलाई सक्रिय राजनीतिबाट बाहिर राख्ने निर्णय भएपछि, नयाँ प्रतिबद्धतालाई जोड्दै दलमा “घृणा, अपमान र बहिष्कारको राजनीति” अन्त्य गर्न आव्हान गर्दै आइरहेका छन् ।
यसै बीच बुधबार नेपाल प्रेस सोसाइटीले भक्तपुरमा आयोजना गरेको साक्षात्कार कार्यक्रममा बोल्दै नेता थापाले राजनीतिक विचार र अभिव्यक्तिमा लगाइने कुनै पनि प्रतिबन्ध लोकतान्त्रिक मूल्यको ठाडो उल्लङ्घन भएको बताएका छन् ।
थापाले भने, ‘नेकपा एमाले भनेको विचारलाई बन्देज लगाउने पार्टी होइन । हामीले मार्गदर्शक सिद्धान्तको रूपमा जबज अपनाएका छौँ भने विचार, अभिव्यक्ति र राजनीतिक स्वतन्त्रताको सम्मान गर्नुपर्छ ।’ भण्डारीजस्ता नेतृलाई निषेध गर्न खोज्नु राजनीतिमाथिको अंकुश भएको बताए ।
‘कुनै पदमा पुगेपछि त्यसको अवधि हुन्छ, त्यसपछि त्यो व्यक्ति आम नागरिक बन्ने हो, राजनीतिक विषयवस्तु अगाडि सार्दैमा कोही पनि डराउनु पर्दैन, न कसैमाथि कारबाही हुन्छ’ थापाले भने। एमालेभित्र विद्या भण्डारीको सक्रियतामाथि उठेका प्रश्नहरू ‘भित्रभित्रै सल्किरहेको भुसको आगो’ भएको टिप्पणी गरेका थिए ।
कार्यकर्ताको आवाज, नेतृत्वको गलत क्रियाकलापको विरुद्धमा संघर्ष गरेकै कारण भिम रावल एमालेबाट निकालिए । वाम देवको आफ््नै हठ, झलनाथ र माधवले पनि ओलीको विधान नीतिले फालिए । अहिले विद्या र विद्यालाई साथ दिएको अभियोगमा विभिन्न कार्याकर्ताहरु निष्काशित परे जसरी कार्यकर्ताको बीचबाट कर्ण पनि कर्णप्रिय हुनबाट बञ्चित हुने त होइनन् !
