चन्द्रा श्रीस, काठमाडौँ ।
राष्ट्रिय जनमोर्चा गुल्मीका पूर्व उपाध्यक्ष कृष्ण रेश्मीको निधन भएको छ ।
२०८२ साउन १० गते शनिबार राति आफ्नै निवास छत्रकोट गाउँपालिकाको द्वौघामा ६२ वर्षको उमेरमा उहाँको निधन भएको हो
राजमो गुल्मीकी नेतृ नरमाया रानाका अनुसार स्मृतिशेष रेश्मीको साउन ११ गते कालीगण्डकी किनार रिडीघाटमा दाहसंस्कार गरिएको छ ।
उहाँ लामो समयदेखि आन्द्राको क्यान्सरबाट पीडित हुनुहुन्थ्यो ।
रेश्मीको पार्थिव शरीरमाथि राजमो गुल्मीका उपाध्यक्ष टेकबहादुर केसीले पार्टीको झन्डा ओढाउनुभएको थियो ।
सोही क्रममा नेकपा (मसाल) गुल्मीका प्रवक्ता ओमेन्द्र कुँवरले स्मृतिशेष रेश्मीको पारिवारिक पृष्ठभूमिको जानकारीसहित शोकमन्तव्य राख्नुभएको थियो ।
मन्तव्यको क्रममा कुँवरले रेश्मी मसालको पार्टीसदस्यसमेत रहेको जानकारी गराउनुभयो ।
श्रद्धाञ्जली कार्यक्रममा राजमो नेताहरू मित्रलाल तरामु, ओम सिँजापती, गुमानसिंह पुन, नरमाया राना, कमल पुलामी, श्यामलाल पन्थ, बलबहादुर पुलामी, दधिरामसहित विभिन्न नेताहरूको उपस्थिति रहेको थियो ।
रेश्मीको परिवारमा श्रीमती, दुई छोरा र एक छोरी हुनुहुन्छ ।
