दक्षिण कोरियामा केही दिनयता परेको मुसलधारे वर्षाका कारण आएको बाढी र पहिरोमा कम्तीमा १४ जनाको मृत्यु भएको छ । दक्षिण कोरियाको विपद् व्यवस्थापन कार्यालयले यो जानकारी दिएको भन्दै बीबीसीले समाचार छापेको छ ।

१२ जना अझै बेपत्ता भएकाले मृत्यु हुनेको संख्या बढ्न सक्ने आशंका गरिएको छ । उद्धार कार्य जारी छ । आइतबार एउटा भिडियो फुटेजमा पहिरो प्रभावित गाप्योङ सहरका मानिसहरू दलदल जस्तो हिलो हुँदै हिँडिरहेको र राहत शिविरमा जान क्षतिग्रस्त पुल पार गरिरहेको देखिएको थियो ।

शनिबार देखिएको अर्को भिडियो फुटेजमा दक्षिणको चुङचियोन क्षेत्रमा पहिरो गएपछि एउटा पूरै गाउँ हिलो र भग्नावशेषमा पुरिएको थियो ।