तिला लेकाली ##
—१—
कुकुर पनि शेर हुन्छ हाम्रो सहरमा
कुरा मात्र धेर हुन्छ हाम्रो सहरमा
खातपिते, डुल्ते भए ज्यादै छिटो हुन्छ
काम गर्न बेर हुन्छ हाम्रो सहरमा
—२—
विकास भनेको भयो मात्र नारा
फगत कुर्सी रोज्ने भए भाइमारा
कसरी बनेका हुन् यति धेरै भ्रष्ट
विचारैबिनाका बने सर्वहारा
—३—
जता जाऊँ डाँडापाखा हरियाली राम्रो
स्वर्गभन्दा प्यारो लाग्छ देश नेपाल हाम्रो
आफ्नै देशको अन्नपानी वातावरणमा
स्वाभिमानी बन्न सक्छौँ लगाएर भाङ्ग्रो
—४—
नागबेली पाखापर्वत सबै सेरोफेरो
प्रकृतिले हरियाली सुन्दर देश मेरो
जाऊँ घुमुँ यात्रा गरुँ फर्की आएर
यहीँ फाल्न पाऊँ लाग्छ प्राणपखेरो
—५—
सधैँ प्रयास गर्न सकुँ जीवन जल्नलाई
आफ्नो प्रकाश प्राप्त गरी आफैँ बल्नलाई
सकिँदैन अर्कालाई परिवर्तन गर्न
प्रयास गरौँ आफ्नो जीवन आफै बदल्नलाई
(बेलबारी, मोरङ)