प्रकाश थापामगर/गोविन्दकुमार शर्मा, काठमाडौँ ।
राष्ट्रिय जनमोर्चाका अध्यक्ष तथा सांसद चित्रबहादुर केसीले देशको भ्रष्ट राजनीतिप्रति व्यङ्ग्य गर्दै भन्नुभएको छ–’सरकारमा जाने नै पैसा कमाउनु भएपछि नैतिकताको कुरा भएन ।’
२०८२ असार ३१ गते मङ्गलबार युगदर्शन मिडियालाई सङ्क्षिप्त भिडियो प्रतिक्रिया दिँदै उहाँले सो धारणा व्यक्त गर्नुभएको हो ।
‘नेपालमा सरकारमा बस्नेहरूको नैतिकता भन्ने नै हुँदैन’ उहाँले भन्नुभयो– ‘राजनीति गर्ने, सरकारमा जाने भनेको नै पैसा कमाउनु भएपछि नैतिकताको कुरा भएन ।’
देशको राजनीतिमा जसरी हुन्छ, पैसा कमाउने आम संस्कृति बन्दै गइरहेको उहाँको ठम्याइ थियो ।
अध्यक्ष केसीले राजनीतिको नाममा भ्रष्टाचार गर्ने, सम्पत्ति कमाउनेको ठुलो जमात नै रहेको बताउनुभयो ।
धेरै पहिला राजमोका एक जना स्थानीय जनप्रतिनिधिले घुस खाएकोमा कारबाही गरेको प्रसङ्ग स्मरण गर्दै उहाँले ती भ्रष्टाचारीलाई एमालेले नौमती बाजा बजाएर भित्राएको बताउनुभयो ।
उहाँले प्रश्न गर्नुभयो– ‘राष्ट्रिय जनमोर्चाबाहेक संसद्मा गएको कुन पार्टी छ, घुस नखाने, भ्रष्टाचार नगर्ने, राष्ट्रघात नगर्ने ?’’हुँदा हुँदा त प्रधानमन्त्री विदेश भ्रमणमा जाँदा पनि मान्छे लग्यो भनेर अख्तियारमा उजुरी परेको छ’ केसीले भन्नुभयो ।
देशका वामपन्थी भनिएका पार्टीहरूमै विकृति बढेकोमा उहाँले चिन्ता व्यक्त गर्नुभयो ।
‘ठेकेदार, तस्कर, भ्रष्टाचारीसित रकम लिने अनि समाजवाद, साम्यवादको कुरा गर्ने’ सांसदसमेत रहनुभएका केसीले भन्नुभयो– ‘यो हद दर्जाको पतन हो ।’
उहाँले सत्तामा बस्नेहरूको यस्तो संस्कारमा परिवर्तन भएन भने देशमा ठुलो अनिष्ट हुने बताउनुभयो ।
उहाँले देशमा विकृति, विसङ्गति फैलिएको अवस्थामा विदेशी चलखेल बढ्दै जाँदा कतै देश प्यालेस्टाइन बन्ने त होइन भन्ने जलत्रास बढेको बताउनुभयो ।
देशमा घुस खाने, त्यही पैसा गुलछर्रा उडाएर जनता छल्ने प्रवृत्ति बढ्दै गएको उहाँको बुझाइ थियो ।
एनजिओ, आइएनजिओमा लागेर नेता कार्यकर्ता पाल्ने, उनीहरूले नै भ्रष्ट प्रवृत्तिलाई बढावा दिएको बताउँदै उहाँले भन्नुभयो– ‘यो खतरनारक प्रवृत्तिको विरोध गर्नुपर्छ, भण्डाफोर गर्नुपर्छ ।
