काठमाडौँ । नेकपा (मसाल) का प्रवक्ता रामप्रकाश पुरीले नेपाली काङ्ग्रेसको अनुशासन समितिले निस्पक्षता देखाउन नसकेको धारणा व्यक्त गर्नुभएको छ ।

२०७९ सालको आम निर्वाचनमा अन्तर्घात गर्ने नेताका विरुद्ध काङ्ग्रेसले कारबाही गरेको समाचार बाहिरिएसँगै उहाँको सो टिप्पणी सार्वजनिक भएको हो ।

२०८२ असार २८ गते शनिबार टिप्पणीमूलक वक्तव्य सार्वजनिक गर्दै प्रवक्ता पुरीले भन्नुभएको छ– “प्युठानको चुनावको सन्दर्भमा नेकाको अनुशासन समितिले त्यस प्रकारको निष्पक्षता वा हैसियत नदेखाएको कुरा छर्लङ्ग छ ।”

“स्वयम् अनुशासन समितिको निष्पक्षता र हैसियतबारे कुरा उठाउने डा. शेखर कोइरालाले पनि डा. गोविन्द पोखरेलले गरेको अन्तर्घातबारे किन कुरा उठाएनन् र उनका विरुद्ध कारबाही गर्नुपर्ने आवश्यकतामा किन जोड दिन सकेनन्” अगाडि टिप्पणीमा भनिएको छ– “त्यसबाट उनले अनुशासन समितिको जुन निष्पक्षता र हैसियतबारे प्रश्न उठाएका थिए, त्यो कमजोरी स्वयम् उनमा पनि भएको देखिन्न र ?”

यस्तो छ, टिप्पणीमूलक वक्तव्यको पूर्ण पाठ :

“नेपाली काङ्ग्रेसको अनुशासन समितिले गत आम चुनावमा नेपाली काङ्ग्रेस वा त्यसले समर्थन गरेका उम्मेदवारका विरुद्ध अन्तर्घात गर्ने नेकाका नेताका विरुद्ध विभिन्न प्रकारका कारबाही गरेको समाचार सञ्चारमाध्यमले बाहिर ल्याएका छन् । त्यस सन्दर्भमा डा. शेखर कोइरालाले प्रकट गरेको विचार उल्लेखनीय छ ।

“अहिले अनुशासन समितिमा रहनुभएका साथीहरू कति कमजोर हुनुहुन्छ भने कारबाहीका लागि सिफारिस भएका केन्द्रीय सदस्य साथीहरूलाई एउटा चिठ्ठीसम्म पनि काट्न सक्ने ताकत राख्नु हुँदो रहेनछ । तपाईंका विरुद्ध यस्तो उजुरी छ, के हो भनेर सोध्न सक्ने हैसियत पनि राख्नु हुन्न उहाँहरू । यस्तो अनुशासन समितिले निष्पक्ष काम गर्न सक्दैन” (नयाँ पत्रिका दैनिक, २६ असार २०८२) ।

नेकाको अनुशासन समितिले गरेको कारबाहीबारे डा. शेखर कोइरालाले गरेको आलोचना सही भएको मान्नको लागि तथ्यगत आधार छ । अन्यत्र कहाँ र कसरी अनुशासन समितिले त्यस प्रकारको निष्पक्षता देखाउन सकेको छैन वा त्यस प्रकारको अन्तर्घात गर्ने नेतालाई “एउटा चिठ्ठीसम्म पनि काट्न सक्ने” र “तपाईंका विरुद्ध यस्तो उजुरी छ, के हो भनेर सोध्न सक्ने” हैसियत राख्नुभएको छैन ? त्यो हामीलाई थाहा छैन र त्या हाम्रो सरोकारको विषय पनि होइन तर प्युठानको चुनावको सन्दर्भमा नेकाको अनुशासन समितिले त्यस प्रकारको निष्पक्षता वा हैसियत नदेखाएको कुरा छर्लङ्ग छ ।

गत आम चुनावमा प्युठानमा पाँचदलीय गठबन्धनका तर्फबाट राष्ट्रिय जनमोर्चाकी उपाध्यक्ष र केन्द्रीय प्रवक्ता दुर्गा पौडेललाई उम्मेदवार बनाइएको थियो, जसमा नेकाको पूरै समर्थन थियो तर डा. गोविन्द पोखरेलले दुर्गा पौडेललाई पराजित गर्नका लागि खुला रूपले नै अन्तर्घात गरेको कुरा आम रूपमा थाहा भएको कुरा हो । अहिले नेकाको अनुशासन समितिले उनका विरुद्ध कारबाही गर्ने कुरा परै छ, उनले प्युठानको चुनावमा गरेको अन्तर्घातबारे कुनै प्रश्न सोध्ने वा चिट्ठी लेख्नेसम्म काम गर्न सकेको छैन । त्यसबाट डा. शेखर कोइरालाले बताएझैँ नेकाको अनुशासन समिति अत्यन्त कमजोर भएको, निष्पक्षतापूर्वक काम गर्न सक्ने हैसियत नभएको कुरामा कुनै शङ्का रहन्न ।

नेकाको अनुशासन समितिले डा. गोविन्द पोखरेलको विरुद्ध कुनै उजुरी नआएको दाबी गर्न सक्दछ तर उनका विरुद्ध कुनै उजुरी आयो कि आएन ? त्यो मुख्य कुरा होइन । मुख्य कुरा यो हो– प्युठानमा उनले त्यस प्रकारको अन्तर्घात गरेका थिए कि थिएनन् । यो प्युठानका आम जनता र नेकाका सामान्य कार्यकर्तालाई समेत थाहा हुने कुरा परै छ, नेकाको नेतृत्व तहलाई समेत उनले प्युठानमा दुर्गा पौडेललाई हराउनका लागि अन्तर्घात गरेको कुरा थाहा भएको कुरा हो । त्यो अवस्थामा पनि उनका विरुद्ध कुनै उजुरी पर्दैन भने त्यसका लागि खालि अनुशासन समिति मात्र होइन, प्युठानको नेकाको सम्पूर्ण सङ्गठन वा नेकाको नेतृत्वसमेत जिम्मेवार भएको देखिन्छ । स्वयम् अनुशासन समितिको निष्पक्षता र हैसियतबारे कुरा उठाउने डा. शेखर कोइरालाले पनि डा. गोविन्द पोखरेलले गरेको अन्तर्घातबारे किन कुरा उठाएनन् र उनका विरुद्ध कारबाही गर्नुपर्ने आवश्यकतामा किन जोड दिन सकेनन् । त्यसबाट उनले अनुशासन समितिको जुन निष्पक्षता र हैसियतबारे प्रश्न उठाएका थिए, त्यो कमजोरी स्वयम् उनमा पनि भएको देखिन्न र ?”