धनवीर पुनमगर#
काठमाडौँ । यतिवेला वैश्विक रुपमा साम्राज्यवादले नाङ्गो प्रकारले हस्तक्षेप बढाइरहेको छ । विभिन्न देशहरूमा अमेरिकी साम्राज्यवादले गर्दै आइरहेको विध्वंसात्मक आक्रमणबाट सिङ्गो मानव समाजलाई नै खतरामा पारिरहेको सहजै रुपमा बुझ्न सकिन्छ । यसरी भन्नु पर्दा अमेरिकाले सिङ्गो संसारलाई आफ्नो आधिपत्यको रुपमा बुझ्ने गरेको छ ।
अमेरिकी साम्राज्यवादले विभिन्न देशहरूमाथि गर्दै आएको आक्रमण सांघातिक हमला त हो नै, त्यसको साथसाथै विभिन्न बहानामा विभिन्न देशहरुलाई सताउँदै आइरहेको पनि छ । जस मध्यः आणविक क्षेप्यास्त्रहरू राखेको, आतंकवादलाई संरक्षण गरेको, आफ्ना कुटनीतिक गतिविधिमा संलग्न नभएको लगायतका वहानामा विभिन्न देशहरूका सार्वभौमिकता माथि नै हमला गर्दै आइरहेको छ ।
यसै बीच साम्राज्यवाद विरुद्ध आज २०८२ असार २१ गते नेपालका पाँच वामपन्थी राजनीतिक पार्टीहरूले संयुक्त बैठक सम्पन्न पारेका छन् । बैठकमा नेकपा (मसाल) का महामन्त्रि मोहनविक्रम सिंह, नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधवकुमार नेपाल, नेपाल कम्यूनिष्ट पार्टी (नेकपा) का प्रवक्ता खड्क बहादुर विश्वकर्मा ‘प्रकाण्ड’, क्रान्तिकारी कम्यूनिष्ट पार्टी नेपालका कार्यवाहक महासचिव सिपी गजुरेल बीच सम्पन्न बैठक सम्पन्न भएको हो । बैठकमा नेकपा (माओवादी) केन्द्रका महासचिव देव गुरुङ र अखिल नेपाल किसान महासंघ (अप्फा) का अध्यक्ष भैरवराज रेग्मीको पनि उपस्थिति रहेको थियो ।
उक्त बैठकले अमेरिकी साम्राज्यवादको विरुद्धमा संघर्ष गर्ने निर्णय गरेको बैठकमा सहभागि भैरवराज रेग्मीले हामीलाई जानकारी दिनुभएको छ ।
अमेरिकी साम्राज्यवादले विभिन्न देशहरूका राष्ट्रिय स्वाधीनतामाथि मात्रै नभएर अन्तर्राष्ट्रिय कानुनको उल्लङ्घन समेत गर्दै आएको बैठकमा सहभागी वामपन्थी शिर्ष नेताहरूले टिप्पणी गरे । अमेरिकी साम्राज्यवादले तेश्रो विश्वयुद्धको दुष्प्रयास गरेको नेताहरूको ठम्याई रहेको थियो ।
‘नेकपा (माओवादी केन्द्र)को केन्द्रीय कार्यालय पेरिस डाँडामा बैठक सम्पन्न भयो ।’ रेग्मीले भन्नुभयो, ‘आजको बैठकमा सहभागि वामपन्थी पार्टीहरूले आगामी यहि असार २३ गते पुनः बैठक बसी साम्राज्यवाद विरुद्ध सड्कमा आन्दोलनको गर्ने सहमति गरेको छ ।’
सड्क कार्यक्रममा अन्य वामपन्थी दलहरू, नागरिक समाज एवं साम्राज्यवाद विरोधी व्यक्तिहरूलाई समेत सहभागि गराउने बारेमा छलफल भएको रेग्मीले बताउनु भयो ।
त्यस्तै रेग्मीका अनुसार साम्राज्यवाद विरुद्ध खुकुलो प्रकारको फोरम पनि निर्माण गर्ने सहमति भएको छ । उक्त फोरमलाई कसरी सञ्चालन गर्ने भन्ने बारे पछि छलफल गरि टुंगो लगाउने रेग्मीको भनाई थियो ।
