मेघराज भट्टराई ##

वर्षौंदेखि मध्यपूर्वमा द्वन्द्व छ । अफ्रिकन महादेशमा कहिलै शान्ति हुँदैन । यसको मुख्य कारण अमेरिकी साम्राज्यवादी रणनीति हो । आफ्नो उत्पादित हतियार बिक्री गर्न अफगानिस्तानदेखि कङ्गो, सिरिया, लिबिया, युगान्डा, यमन, सुडान, इराक, प्यालेइस्टाइन कहिलै शान्तसँग बाँच्न पाएका छैनन् । निर्दोष नागरिकको हत्या गर्ने, बालबालिका, महिला असहाय नागरिकमाथि बम बर्साउने, सहायताकक्षमा जम्मा भएका नागरिकमाथि निर्मम नरसंहार गर्ने साम्राज्यवादीका गोठालाले आफूमाथि प्रत्याक्रमण हुँदा मानवअधिकार गुहार्न सुहाउँछ ? के ती प्यालेस्टाइन नागरिकको बाँच्न पाउने अधिकार थिएन ?

सोमालियामा वर्षौंदेखि द्वन्द्व कसले सिर्जना गरायो ? युगोस्लोभिया, चेकोस्लोभाकिया, बोस्निया हर्जागोभिनाजस्ता देशमा द्वन्द्व गराउने को हो ?
अगस्त ६, १९४५ नागासाकी र अगस्त ९ मा हिरोसिमामा बम कसले बर्सायो ? के जापानीको बाच्न पाउने अधिकार थिएन ? कि मानवअधिकार युरोपियन र अमेरिकनको मात्र हो ? अरू मानव होइनन् ? हिजोसम्म अन्तर्राष्ट्रिय मानवअधिकार सहयोग सङ्गठनले गाजामा नरसंहार रोक भन्दा ती निर्दोष नागरिकलाई के सम्झेर मारेको हो ? आज इरानमा द्वन्द्व सुरु कसले गरेको हो ? एकातिर, वार्ताको टेबलमा बसेर शान्ति सम्झौताको नाटक गर्ने, अर्कोतिर इरानका सेनाका उच्च अधिकारी, वैज्ञानिक कमान्डोलाई मार्ने—के यो एउटा सार्वभौम राष्ट्रमाथिको हमला थिएन ? जनवरी ३, २०२० मा कासिम सुलेमानीलाई मार्नु मानवअधिकार विरुद्ध अपराध थिएन ? सेता मान्छे मान्छे, काला मान्छे जनावर हुन् ? इजराइललाई मान्छे मार्न छुट के कति कारणले दिइयो ?

साम्राज्यवादी नीति के हो भन्दा प्राकृतिक सम्पदाले भरिएका देशभित्र जातीय धार्मिक भाषिक द्वन्द्व गराउने र त्यो देशका साधनश्रोत लुट्ने । पहिले बेलायतले संसारभरिबाट लुट्यो, अहिले अमेरिकाले ।

सद्दाम हुसैनले रासायनिक हतियार बनायो । यो संसारका लागि खतरा भयो भनेर जबर्जस्ती युद्ध थोपरियो । २० वर्ष खोजेर पनि रासायनिक हतियार भेटिएन । भौतिक पूर्वाधार बर्बादी मात्र भएन, लाखौँ निर्दोष मानिस मारिए ।

सद्दाम हुसैनको समयमा इराकको अवस्था कस्तो थियो ? आज कस्तो छ ? यो कसैबाट लुकेको छ र ? यही हाल लिबियाका सत्ता सञ्चालक कर्नेल गद्दाफीसँग भयो । गद्दाफीको समय लिबियामा जनताको हालत कस्तो थियो ? आज के छ ? बच्चा जन्मियो, पाँच हजार डलर । वैवाहिक जोडीका लागि घर बसाउनेलाई पाँच हजार डलर । शिक्षा, स्वास्थ्य निःशुल्क किसानका लागि जमिनदेखि मलखाद, बिउ, औषधी, सिचाइँ र उत्पादित वस्तु राज्यले किनिदिनेजस्ता काम कुन देशले गरेको छ अफ्रिकन मुलुकमा ? आज त्यहाँका जनता आपसमै लडेका छन् । फाइदा इजराइल, अमेरिकाले उठाएका छन् । यही हाल इराकको छ । अफगानिस्तानमा डाक्टर नजिबुल्लाको हत्या तालिबान प्रयोग गरेर भयो । त्यो बेलाको अफगानिस्तान आज कल्पना पनि गर्न सकिदैन ।

के हो युद्ध अपराध ? के हो मानवअधिकार ? त्यो त सबैमा लागु हुने होला नि ? अमेरिकाले परमाणु हतियार राख्न पाउने, अरूले राख्न नपाउने हो ? एमनेस्टी इन्टरनेसनलले इसराइलका प्रधानमन्त्री नेतान्याहुमाथि मानवअधिकार उल्लङ्घन गरेको र अन्तर्राष्ट्रिय क्रिमिनल कोर्टले अरेस्ट वारेन्ट जारी गरेको कति भयो ? के अन्तर्राष्ट्रिय अदालतभन्दा इजराइल ठुलो हो ? उसले मनलाग्दो गर्न पाउने हो ? राति सुतिरहेको समयमा इरानमाथि बम खसाल्ने युद्ध अपराध होइन ?

आज हरेक देशमा दुई थरि नागरिक छन् : गरिब र धनी । गरिब नागरिकमाथि गास, बास, कपासको व्यपस्था गर्ने कि जनता भाडामा जाउन मानव मार्न पैसा लगाउने ? साम्राज्यवादी नीति मान्छे मार्न महामारी फैलाउँछन् । यिनीहरू आज पनि दासदासी राखेका छन् ।
धनी र गरिब हरेक देशमा छन् । धनी केही प्रतिशत छन भने गरिब बहुसङ्ख्यक छन् । नागरिकले कर तिरेको छ । त्यो पैसा युद्धका लागि आफ्ना गोठालालाई दिएको छ । यसको विरोध गरौँ । मानवअधिकारमा विभेद नगरौँ ।