काठमाडौँ । पाँच लाख आप्रवासीलाई अमेरिकाले तत्कालै देश छाड्न निर्देशन दिने भएको छ ।

अमेरिकाको डिपार्टमन्ट अफ होमल्यान्ड सेक्युरिटी (डिएचएस) ले बिहीबार एक विज्ञप्तिमार्फत् क्युबा, हाइटी, निकारागुआ र भेनेजुएलाका नागरिकलाई यसअघि निष्काशन गर्नबाट लगाइएको अस्थायी रोक अन्त्य गरिएसँगै सो स्थिति निर्माण भएको हो ।

उनीहरूलाई अमेरिकाबाट बाहिरिन आग्रह गर्दै इमेल पठाइने उक्त निकायले जनाएको छ ।

पूर्वराष्ट्रपति जो बाइडनले आफ्नो कार्यकालमा चार देशका पाँच लाख नागरिकलाई दुई वर्ष अमेरिकामै बस्न सक्ने अनुमति दिएको डिएचएसले जनाएको छ ।

ट्रम्प प्रशासनको आम निष्काशन कार्यक्रमजस्तै पछिल्लो निर्देशन विरुद्ध पनि कानुनी चुनौती दिइने ठानिएको छ ।

आफ्नो कार्यकालमा बाइडेनले उनीहरूका लागि अमेरिकामा रहने सुविधा बढाएका थिए, जसलाई ह्युमेनिटेरिअन परोल नाम दिइएको थियो । उनीहरूलाई आआफ्नो देशको अवस्थाका कारण अमेरिकामा रहने सुविधा दिइएको बताइएको थियो ।

डिएचएसका अनुसार सन् २०२४ को नोभेम्बर अन्त्यसम्म पाँच लाख ३१ हजार छ सय ७० जना मानिसलाई उक्त कार्यक्रमअनुसार अमेरिकामा बस्ने अनुमति दिइएको थियो । यसले ती चार देशबाट अमेरिकामा हुने गैरकानुनी प्रवेश ९८ प्रतिशतले घटेको थियो ।

नयाँ निर्देशिकाबाट ठ्याक्कै कति मानिस प्रभावित हुन सक्छन् भन्ने अझैसम्म प्रस्ट छैन । ती देशका कतिपय आप्रवासी अन्य भिसा प्रक्रियाबाट यो अवधिमा अमेरिकामै रहने कानुनी अनुमति पाइसकेका छन् ।

बाइडेन प्रशासनले अमेरिकी प्रायोजक रहेका आप्रवासीको पृष्ठभूमि अध्ययन गरिएको र उनीहरूलाई जाँच गरेर मात्रै अमेरिकामा रहने अनुमति दिइएको बताएको थियो तर ट्रम्प प्रशासनले यो विषयमा असहमति जनायो ।

डिएचएस प्रवक्ता ट्रिसिया मिक्लक्लिनले बाइडन प्रशासनका पालामा भएको कार्यक्रमलाई “विनाशकारी“ भएको प्रतिक्रिया दिइन् । उक्त कार्यक्रमले ठगी र अपराधका लागि ढोका खोलेको र अमेरिकी कामदारको माग घटाएको उनले बताइन् ।

पछिल्लो अमेरिकी राष्ट्रपतीय निर्वाचनका क्रममा पनि यो कार्यक्रम चुनावी मुद्दा बनेको थियो ।

विशेष गरी ट्रम्प र उनका सहयोगीले पछिल्ला वर्षमा अमेरिकाका केही सहर उक्त कार्यक्रमअन्तर्गत अमेरिका बस्न अनुमति पाएका हाइटीका नागरिकको भिड हुन थालेको विषय उठाएका थिए ।

ट्रम्प र अन्य नेताहरूले हाइटीबाट आएका आप्रवासीले घरपालुवा जनावर खाएकोजस्ता मानिसलाई भड्काउने अभिव्यक्ति दिए तर उक्त कुराको कुनै प्रमाण थिएन यद्यपि उनका उपराष्ट्रपतिका उम्मेदवार जेडी भान्सले धेरै आप्रवासीका कारण अमेरिकी जनताले दुःख पाएको विषयमा मानिसको ध्यान आकृष्ट गर्न कथा बुनिएको भन्दै ट्रम्पको बचाउ गरेका थिए ।

राष्ट्रपति ट्रम्पले ज्यानुअरीमा आफ्नो कार्यकाल सुरु गरेको केही समयमै बाइडनले दिएको विशेष अनुमति खारेज गर्ने कार्यकारी आदेश जारी गरेका थिए तर गत मेमा अमेरिकाको सर्वोच्च अदालतले बाइडनको परोल कार्यक्रम खारेज गर्ने ट्रम्पको निर्णय कार्यान्वयन नगर्न आदेश दिएको थियो । उक्त मुद्दा तल्लो अदालतमा अझै विचाराधीन छ ।

डिएचएसले आफैँ देशबाट बाहिरिन चाहने अमेरिकामा रहने कानुनी हैसियत नभएका आप्रवासीलाई यात्रामा सहयोग र एक हजार अमेरिकी डलर बोनस दिने प्रस्ताव गरेको छ । (बिबिसी)